Прэзідэнт Польшчы выступіў са зваротам пасля спробы «захопу» Трыбунала
Кароль Наўроцкі заявіў, што сёння будуць скліканыя прадстаўнікі парламенцкіх сіл, каб дамагчыся стабілізацыі палітычнай сітуацыі і аднаўлення канстытуцыйнага парадку.
Прэзідэнт Польшчы Кароль Наўроцкі заявіў, што гэтай ноччу ў Варшаве адбыўся сілавы захоп Канстытуцыйнага трыбунала — аднаго з найвышэйшых судовых органаў краіны, піша Onet.pl.
«Гэтай ноччу ў Рэспубліцы Польшча адбылося парушэнне грамадскага парадку і сілавы захоп канстытуцыйнага дзяржаўнага органа. Я правёў кансультацыі з першым старшынёй Вярхоўнага суда, суддзёй Збігневам Капіньскім, які таксама не лічыць законнымі дзеянні асобаў, што ўзурпуюць уладу ў Канстытуцыйным трыбунале», — заявіў ён, выступаючы перад удзельнікамі мітынгу.
Канстытуцыйны трыбунал Польшчы — найвышэйшы орган канстытуцыйнага кантролю, які правярае законы і іншыя нарматыўныя акты на адпаведнасць Канстытуцыі. Ён таксама разглядае спрэчкі аб паўнамоцтвах цэнтральных дзяржаўных органаў і скаргі грамадзян на парушэнне іх канстытуцыйных правоў. Рашэнні Трыбунала з'яўляюцца агульнаабавязковымі і канчатковымі.
Таму кантроль над яго складам і кіраўніцтвам мае значнае палітычнае значэнне: суд можа прызнаваць неканстытуцыйнымі законы, якія прымаюць парламент і ўрад.
Наўроцкі заклікаў аднавіць правапарадак, а сілавікоў — пакінуць тэрыторыю Канстытуцыйнага трыбунала.
«У сувязі з пагрозай унутранай бяспецы Рэспублікі Польшча я склікаю на сёння тэрміновыя кансультацыі з удзелам прадстаўнікоў парламенцкіх сіл, каб дамагчыся стабілізацыі палітычнай сітуацыі і аднаўлення канстытуцыйнага парадку», — дадаў ён.
У Польшчы дзве групы суддзяў лічаць сябе законнымі прадстаўнікамі Канстытуцыйнага трыбунала, а прэзідэнт і ўрад падтрымліваюць розныя бакі. Таму пытанне пра тое, хто мае права кіраваць судом і распараджацца яго будынкам, стала прадметам палітычнага супрацьстаяння.
Канфлікт пачаўся яшчэ ў 2015 годзе. Тады кансерватыўная партыя «Права і справядлівасць» (PiS) прыйшла да ўлады і пачала змяняць судовую сістэму. У прыватнасці, яна прызначыла суддзяў Канстытуцыйнага трыбунала на месцы, якія ўжо былі занятыя суддзямі, абранымі папярэднім парламентам. Гэта выклікала абвінавачанні ў палітызацыі суда і крызіс яго легітымнасці.
Святлана Ціханоўская пра крытыку з боку Ціханоўскага: Мне ад гэтага вельмі крыўдна і непрыемна40
Каментары