Каўбасу з бабраплануецца экспартаваць, паведаміў сёння журналістам начальнік аддзела паляўнічай гаспадаркі Міністэрства лясной гаспадаркі Беларусі Сяргей Шастакоў падчас дэгустацыі прадукцыі з мяса дзікіх жывёл на выставе «Паляванне і рыбалоўства. Вясна-2017», перадае БЕЛТА.
«Мы плануем выйсці на нашы дыпмісіі з прапановай пастаўляць каўбасу з бабра за мяжу. Гэта не кураціна, не свініна, якую бачым усюды на прылаўках, гэта ўсё-такі абмежаваная партыя прадукцыі, дзівоцтва», — сказаў Сяргей Шастакоў.
На дэгустацыі прадставілі пробную партыю каўбасы з бабра двух відаў (з дадаткам дзікай качкі і аленіны), а таксама шашлык з бабра.
«Мы падрыхтавалі невялікую прэзентацыйную партыю каўбасы. Пакуль яна не прадаецца. У гэтай каўбасе 30% мяса бабра і 70% іншага мяса, напрыклад, аленіны. Гэта аптымальныя суадносіны. Прапорцыю можна мяняць, але мы імкнёмся падладзіцца пад густы спажыўцоў, каб гэтую каўбасу можна было рэалізоўваць. Вывучылі досвед краін-суседзяў і пераканаліся, што амаль ніхто не робіць чыстую каўбасу з бабра. Мяса бабра па сваёй структуры даволі вадзяністае, таму па рэцэптуры пажадана змешваць яго з іншымі відамі. Мы зрабілі сыравэнджаную каўбасу з тэрмінам захоўвання каля двух месяцаў — гэта цалкам прымальны тэрмін для яе рэалізацыі», — растлумачыў начальнік аддзела паляўнічай гаспадаркі.
Вытворчасць каўбасы з бабра плануецца наладзіць восенню-зімой гэтага года, бо сезон палявання на бабра пачынаецца з 1 верасня.
«Нарыхтоўкай будуць займацца лясгасы. У цэлым па Беларусі здабываецца каля 9 тысяч асобін бабра. Прыкладна 30-40% пойдзе на каўбасу», — дадаў Сяргей Шастакоў. Мяркуецца, што кошт гэтай каўбасы можа скласці 25-30 рублёў за 1 кг.
Начальнік аддзела паляўнічай гаспадаркі адзначыў, што мяса бабра вельмі карыснае. «Мы параўноўвалі яго з мясам труса, свінінай, ялавічынай, і па многіх паказчыках яно пераўзыходзіць гэтыя віды мяса, напрыклад, па ўтрыманні жалеза, вітаміну С. Яно будзе асабліва карыснае для тых, у каго нізкі гемаглабін», — падкрэсліў ён.
Нарыхтоўка бабра звязаная з яго лішкам у некаторых рэгіёнах.
«Бабры — той від, які ўплывае на натуральныя ландшафты. Іх не павінна быць на меліярацыйнай сетцы. Яны будуюць плаціны, у выніку падымаецца ўзровень вады, адбываецца падтапленне, наносіцца шкода як лясной, так і сельскай гаспадарцы. Таму пэўная колькасць бабра адбіраецца. Мы проста накіруем пэўны працэнт на гандаль», — сказаў Сяргей Шастакоў.
Цяпер чытаюць
«Я не святая, але ў мяне не было надзейнага пляча побач»: маці Ксюшы з СМА могуць пазбавіць бацькоўскіх правоў, яна ж даводзіць, што здольная выправіцца12
Каментары