Вайна за пахаванне — пасля скаргі настаўніцы апазіцыю будуць судзіць за суботнік на могілках?
9 мая актывісты Аб’яднанай грамадзянскай партыі правялі суботнік на мемарыяле ў Драздах. Гэта абурыла дырэктарку мінскай школы.
«Педагог СШ №104 Наталля Мікалаеўна звярнулася ў раённую адміністрацыю не для таго, каб паскардзіцца на брудны пад'езд ці пабітую дарожку ў парку. Яе, як і яе калегаў, абурылі публікацыі на асобных інтэрнэт-парталах аб суботніку сяброў некаторых палітычных партый, які прайшоў 9 мая ў месцы масавых пахаванняў ваеннапалонных і мірных грамадзян канцлагера «Дразды», — паведамляюць «Мінск-Навіны».
Абурыла педагога акцыя АГП, якую партыя праводзіць штогод. І сёлета правацэнтрысты прыбраліся на мемарыяле і ўсталявалі ўказальнік.
Але ж педагог — хутчэй за ўсё, абуралася дырэктарка школы, Наталля Сідарэнка — абурылася заявай актывістаў пра закінутасць помніка.
«Толькі цяперашняй вясной мы правялі там пяць суботнікаў, у якіх удзельнічалі як педагогі, так і вучні. У школьным музеі пастаянна дзейнічае экспазіцыя, прысвечаная Драздам, кожны год праводзім на тэрыторыі мемарыяла вахты памяці, прыёмы ў піянеры, мітынгі, ўскладаем вянкі ля памятнага знака. Займаемся гэтым не для таго, каб хтосьці нас пахваліў, а таму што шануем памяць ахвяр вайны, пахаваных у Драздах. Таму сваю працу асабліва і не афішуем. Мы вучым нашых школьнікаў, што пра добрыя справы не крычаць. І вось уявіце наша абурэнне, калі мы прачыталі ў інтэрнэце аб тым, што прадстаўнікі апазіцыі навялі парадак на пахаванні «Дразды», да якога, нібыта, нікому, акрамя іх, няма справы!» — заявіла Наталля Мікалаеўна.
Яна кажа, што «прачытаць такое было вельмі крыўдна як настаўнікам, так і дзецям, якія працуюць на мемарыяле не адзін раз за год».
«Яны прыйшлі і правялі там суботнік! Ды што там ужо было прыбіраць пасля таго, як мы столькі разоў праводзілі там свае працоўныя акцыі, ды і адміністрацыя раёна працавала там падчас рэспубліканскага суботніка?! — абураецца дырэктарка. — Апазіцыя проста спекулюе на нашай гісторыі, на ахвярах вайны…»
Цікава, што чыноўніцтва жвава адрэагавала на словы педагога.
Кіраўнік адміністрацыі Цэнтральнага раёна Ігар Бузоўскі пагадзіўся з пунктам гледжання заяўніцы і паабяцаў, што раённыя ўлады зробяць усё магчымае, каб падобныя паклёпы больш не паўтараліся. Ён не выключае, што пытанне аб недакладнай інфармацыі, якая прагучала на асобных інтэрнэт-рэсурсах, можа быць разгледжана ў судовым парадку.
Сама Наталля Сідарэнка адмовілася ад каментароў «Нашай Ніве».
У сваю чаргу ў АГП адказваюць — да суда гатовыя.
«Я гатовы ісці ў суд і нават спадзяюся, што працэс адбудзецца. Мне ёсць што сказаць Бузоўскаму, бо ён не валодае тэмай і хоча проста нас прынізіць, — адказаў «Нашай Ніве» адзін з арганізатараў суботніка Мікалай Казлоў, лідар мінскай арганізацыі АГП. — Што тычыцца школьнікаў, то я бачыў, што яны прыбіраюць, яны вялікія малайцы.
Але справа не ў гэтым. Размова не пра камень, а непасрэдна пра пахаванне, дзе ляжаць дзесяць тысяч чалавек. Яно знаходзіцца ў полі, на чалавечых парэштках расце зерне. Ніхто гэтым пытаннем не займаецца. Толькі на ўскрайку стаіць той камень.
Дык ёсць каму справа ці не да таго пахавання?»
Цяпер чытаюць
«Я больш не анархіст». Мікола Дзядок — пра турму, Бога і расчараванне ў ідэалогіях19
Каментары