«І ў Бога, і ў д’ябла грандыёзныя планы на Беларусь»: Севярынец збірае грошы на выданне рамана «Беларусалім»
Палітык, сустаршыня хрысціянскай дэмакратыі Павел Севярынец абвесціў аб пачатку краўндфандынгавай кампаніі па зборы сродкай на выданне першай часткі рамана «Беларусалім».
Гэтую кнігу Павел Севярынец пісаў 12 гадоў. Ад 2005-га. Раман мог не дайсці да чытача. Быў момант, калі супрацоўнікі Цэнтральнага РУУС канфіскавалі ў Севярынца рукапіс.
«Пасля публікацый і міжнародных зваротаў аддалі. Тады дайшло да таго, што гэтую справу мне давялося абмяркоўваць з Кубілюсам, які быў прэм'ерам Літвы на той момант. Пасля сустрэчы з ім і аддалі. Спярша асноўную частку, а потым і дзве апошнія главы», — расказвае Севярынец.
Агулам на кнігу мяркуецца сабраць 6300 рублёў. Людзям прапануецца ахвяраваць 10, 20 альбо 30 рублёў.
«У ціхай і забытай Беларусі засноўваецца штаб-кватэра карпарацыі «Непагасны свет», якая выбірае эмблемай чорны квадрат і мае мэтай ні больш, ні менш — даць усяму чалавецтву шчасце. Зорка «Непагаснага» Андрэй Белазор, ягоная каханая Вольга Васілеўская і таямнічы геній чорнага квадрата Цімур у навагоднюю ноч трапляюць у галавакружны вір падзеяў з удзелам вышэйшых службовых асобаў Беларусі, міжнароднага капіталу ды вернікаў-хрысціянаў:
евангельскага пастара Льва, пробашча касцёла святога Роха Пятра Гарнастая і праваслаўнага анархіста Яна Яснага. Паступова робіцца зразумела, што і ў Бога, і ў д’ябла грандыёзныя планы адносна Беларусі. Краіна ператвараецца ў поле эпічнай бітвы з відам на Апакаліпсіс», — гаворыцца ў анатацыі да кнігі.
Вокладку да выдання распрацавала жонка Севярынца Вольга.
У Эстоніі арыштаваны Алег Маісееў, кажуць яго знаёмыя. Гэта былы кіроўца Ціханоўскай, які з часам стаў яе зацятым крытыкам23
Каментары