Еўракамісія прыняла ў сераду рашэнне пачаць фармальную праверку падпісанага ў аўторак прэзідэнтам Польшчы Анджэем Дудам закона аб агульных судах на адпаведнасць заканадаўству Еўрасаюза. Адпаведны дакумент будзе накіраваны ў Варшаву, калі тэкст закона апублікуюць у прэсе, паведамляе DW.
Новы закон дае міністру юстыцыі права самастойна прызначаць і звальняць старшыняў судоў. Крытыкі рэформы, сярод іншага, папярэджваюць аб небяспецы ўплыву кіраўніка Мінюста на суды і суддзяў. Акрамя таго, законам прадугледжаны розны пенсійны ўзрост для жанчын і мужчын, што Брусель таксама падвяргае крытыцы.
Віцэ-прэзідэнт Еўракамісіі Франс Тымерманс вітаў прымяненне Дудам свайго права вета ў дачыненні да двух законаў аб рэзка крытыкаванай судовай рэформе — аб рэарганізацыі Вярхоўнага суда і аб Нацыянальным савеце судаўладкавання. Ён падкрэсліў, што як толькі ўрад пачне звальняць суддзяў Вярхоўнага суда, Брусель тут жа пачне працэдуру па 7 артыкуле дамовы ЕС, якая прадугледжвае санкцыі аж да пазбаўлення краіны-парушальніцы права голасу.
«Мы не будзе рэагаваць на шантаж з боку чыноўнікаў ЕС», — заявіў афіцыйны прадстаўнік урада Польшчы Рафал Бахэнэк, каментуючы навіны з Бруселя. На яго думку, усе законы знаходзяцца ў межах канстытуцыі і дэмакратычных нормаў.
Цяпер чытаюць
Арыштаваны міністр прыродных рэсурсаў выбраў «стратэгію Брыло»9
Каментары