Ужо які дзень хочацца зірнуць на мапу і пераправерыць: ці сапраўды мы жывём у Мінску/Магілёве/Баранавічах [падставіць любы патрэбны горад], ці гэта маркесаўскі Маконда, дзе «дождж ліў чатыры гады адзінаццаць месяцаў і два дні».
Каб перажыць гэтае халоднае надвор’е было прасцей, прапануем топ-5 цёплых кніг.
Рыгор Барадулін, «У неба пехатою»
«Паэт будуе сам сябе, як храм
Ці як пахіленую халабуду».
Паэзія Барадуліна заўжды адрознівалася асаблівай цеплынёй і пачуццёвасцю. У гэтым зборніку сабраныя вершы апошніх трох гадоў яго жыцця. Сапраўдны творца не пакідае свой занятак да смерці, так і Рыгор Барадулін: фінальныя рыфмы запісаў за пару дзён да сыходу.
Акрамя надрукаваных вершаў, у кнізе можна ўбачыць унікальныя здымкі і рукапісы паэта, а таксама інтэрв’ю, якое спадар Рыгор даў Сяргею Шапрану напярэдадні свайго 79-га дня нараджэння.
Кацярына Мядзведзева, «Разламашкі майстра Люфта»
Дзівосная кніга аповесцяў і апавяданняў для ўсіх, хто не развучыўся верыць у цуды, нават калі даўно выйшаў з дзіцячага ўзросту. Зборнік можна ахарактарызаваць як «казкі для дарослых». А хто ўвогуле сказаў, што іх чытаюць толькі дзеці? І каб здзяйсняць цуды, зусім не абавязкова быць чараўніком.
Андрэй Федарэнка, «Шчарбаты талер»
З гэтай прыгодніцкай аповесцю можна ладзіць сямейныя вечаровыя чытанні пад акампанемент дажджу. Героі — пяцёра школьнікаў: Чэсь, Міхась, Зміцер, Аксана і Каця. Некаторыя з іх гарадскія, а іншыя жывуць на вёсцы. Што іх аб'ядноўвае, акрамя вёскі Паплавы, дзе ўсе яны сустракаюцца? Дзіцячае жаданне прыгод і незвычайных здарэнняў. Пошукі скарбаў дапамагаюць ім спазнаць саміх сябе, свае здольнасці, убачыць моцныя бакі іншых, упэўніцца ў моцы свайго сяброўства. Усё гэта на фоне амаль што дэтэктыўнай гісторыі з бандытамі, настаўнікам гісторыі, вясковымі жыхарамі, скарбам і вайной 1812 года.
Янка Брыль, «Жменя сонечных промняў»
«На гары за вёскай, любуючыся родным, даўно знаёмым i ўсё яшчэ новым светам — белым, чысценькім у вячэрнім святле, — міжволі, жыва і радасна ўявіў сябе мурашачкай на неабдымна агромністым гарбузе Зямлі…».
Лірычныя замалёўкі пісьменніка заўжды трапныя і мудрыя. Ён няспынна занатоўваў усё, што бачыў і чуў, умеў знаходзіць у гэтым прыгожае і незвычайнае.
Дарэчы, сёлета споўнілася 100 год з дня нараджэння Янкі Брыля. Чым не нагода яшчэ бліжэй пазнаёміцца з яго творчасцю?
Адам Мальдзіс, «Жыццё і ўзнясенне Уладзіміра Караткевіча. Партрэт пісьменніка і чалавека»
«Уладзімір Караткевіч узнёсся на небасхіл айчыннага пісьменства і гарыць там зоркай першай велічыні».
Гэта не падрабязны аналіз творчасці Караткевіча. Гэта кніга, напісаная сябрам пра сябра, напоўненая шчырымі пачуццямі і цікавымі ўспамінамі. Адам Мальдзіс і Уладзімір Караткевіч пазнаёміліся ў 1963 годзе пасля таго, як Мальдзіс напісаў рэцэнзію на раман Караткевіча «Нельга забыць». Іх сяброўства было поўным прыгодаў і камічных сітуацый. У кнізе Мальдзіс паказвае нам Караткевіча-чалавека, гучнага і рамантычнага, вясёлага і шчырага.
-
Пекла можа выглядаць зусім не так, як мы думаем. Пра новы раман Югасі Каляды
-
«Да лейтэнанта прыехала маладая жонка, пабачыла, што адбываецца ў зоне, і застрэлілася». Выйшла заключная частка ўспамінаў Рыгора Бярозкіна пра ГУЛАГ і савецкі Мінск
-
Выйшаў пераклад адной з галоўных п’ес сюррэалізму Ражэ Вітрака
Цяпер чытаюць
Затрымалі чарговага чалавека года Віцебшчыны, дэпутата Віцебскага аблсавета Дзмітрыя Калягу7
Затрымалі чарговага чалавека года Віцебшчыны, дэпутата Віцебскага аблсавета Дзмітрыя Калягу
«Дзіма, мой мікраскоп за паўмільёна еўра стаіць у тваёй клініцы. Абсталяванне скраў ты». Заснавальнік «Новага зроку» расказаў пра адносіны з сям'ёй Абельскіх1919
«Дзіма, мой мікраскоп за паўмільёна еўра стаіць у тваёй клініцы. Абсталяванне скраў ты». Заснавальнік «Новага зроку» расказаў пра адносіны з сям'ёй Абельскіх19
«Да лейтэнанта прыехала маладая жонка, пабачыла, што адбываецца ў зоне, і застрэлілася». Выйшла заключная частка ўспамінаў Рыгора Бярозкіна пра ГУЛАГ і савецкі Мінск1818
Каментары