Колькасць карыстальнікаў сацыяльнай сеткі «Фэйсбук», якія ўбачылі расійскую палітычную рэкламу падчас прэзідэнцкай гонкі ў ЗША, склала каля 126 млн чалавек. Такія дадзеныя, па інфармацыі СМІ, кампанія прадставіць на слуханнях у сенаце ў аўторак.
Як паведамляе агенцтва Рэйтэр, што азнаёмілася з паказаннямі галоўнага юрысконсульта фэйсбука Коліна Стрэтча, у кампаніі высветлілі, што з чэрвеня 2015 г. па жнівень 2017-га з акаўнтаў, звязаных з расійскім «Агенцтвам інтэрнэт-даследаванняў» (IRA), таксама вядомым як «фабрыка троляў», было апублікавана 80 тысяч пастоў.
Як адзначаюць у фэйсбуку, у большасці з іх закраналіся сацыяльныя і палітычныя пытанні, якія выклікаюць рознагалоссі ў ЗША.
Гэтыя допісы, па дадзеных кампаніі, убачылі каля 29 мільёнаў чалавек. А ў выніку перапостаў паведамленняў аўдыторыя расійскай палітычнай рэкламы павялічылася да 126 млн чалавек, што складае каля 40% насельніцтва ЗША, адзначае агенцтва Блумберг.
Усяго за месяц да выбараў, у кастрычніку 2016 года, у «фэйсбуку» былі заблакаваныя 5,8 млн акаўнтаў, якія распаўсюджвалі такія паведамленні. Акрамя таго, былі выдаленыя 170 акаўнтаў у Інстаграме, дзе былі апублікаваныя 120 тыс. паведамленняў.
Па дадзеных крыніцы Рэйтэр, твітар, прадстаўнікі якой таксама выступяць у аўторак у сенаце, выявіла амаль 3 тыс. такіх акаўнтаў.
У кампаніі Google таксама лічаць, што праз відэахостынг YouTube распаўсюджвалася палітычная рэклама ў інтарэсах Расіі.
У Google налічылі 18 створаных для гэтых мэтаў каналаў. У іх былі апублікаваныя больш за тысячу відэаролікаў агульнай працягласцю 43 гадзіны. З чэрвеня 2015 года па лістапад 2016 года гэтыя каналы атрымалі 309 тыс. праглядаў. Усе яны пасля былі заблакаваныя.
Цяпер чытаюць
У беларускі ў Італіі забралі двух сыноў — бо яна не прызнавала дзяржаву і не адпускала дзяцей у школу і да доктара1
Каментары