Ад жніўня гэтага году вядуцца рэстаўрацыйныя працы ў ружанскім палацы Сапегаў. Фотарэпартаж.
Ад жніўня гэтага году вядуцца рэстаўрацыйныя працы ў ружанскім палацы Сапегаў.
Ружанскі палац Сапегаў, закладзены ў пачатку XVII ст., прычакаў такі увагі з боку рэстаўратараў. Гэта, бадай, першыя рэстаўрацыйныя працы за гады незалежнасьці краіны. Яшчэ ў 2004 годзе Ружанскі палац у ліку 26 помнікаў гісторыка-культурнай спадчыны, быў уключаны ў абласную праграму разьвіцьця турыстычнай галіны. І ня дзіва. Палац у стылі позьняга барока з элемэнтамі клясыцызму, беларускі Вэрсаль, як яго яшчэ называюць, знаходзіцца на надзвычай папулярным маршруце Берасьце — Пружаны — Ружаны — Косава.
Найперш спэцыялісты «Берасьцерэстаўрацыі» плянуюць аднавіць галоўную браму і флігеляў, што да яе прымыкаюць. Тут мяркуецца стварыць музэй ды іншыя аб’екты турыстычнай інфраструктуры.
Палац Сапегаў моцна пацярпеў у гады І Сусьветнай вайны. Да нашых дзён датрывалі галоўны і ўсходні карпусы палацу, аркады, галоўная брама і бакавыя флігелі. У савецкія часы былі пачалі аднаўляць галоўную браму, але пасьля распаду СССР працы спыніліся. Тыя ўмацаваньні з чырвонай цэглы пачынаюць пакрысе разбурацца.
Ад жніўня гэтага году рэстаўрацыйныя працы ў ружанскім палацы аднавіліся. Як сьведчыць шыльда каля галоўнай брамы, праект рэалізуецца пры фінансавай падтрымцы Эўрасаюзу ў рамках праграмы добрасуседзтва. Адна дэталь на той шыльдзе пакідае непрыемнае ўражаньне: назва нашай краіны па-ангельску — Byelorussia — патыхае «саўком».
Тым часам, напрыканцы лета студэнты Берасьцейскага дзяржаўнага ўнівэрсытэту імя Аляксандра Пушкіна правялі археалягічныя раскопкі каля ўсходняга флігелю. Паводле кіраўніцтва «Берасьцерэстаўрацыі», тэмпы і аб’ём рэстаўрацыйных працаў будуць залежыць ад фінансаваньня. Пакуль што яно, гледзячы па ўсім, досыць сьціплае. Прынамсі актыўнасьці, падобнай да працаў у Нясьвіжы, дакладна не назіраецца. Можа гэта й да лепшага.
Цяпер чытаюць
Ён адкрыта называў расійскіх вайскоўцаў акупантамі, а расійскую ўладу — фашысцкай. За краты кінулі супрацоўніка МТБанка3
Каментары