«Стралялі, былі асечкі, кулямёт быў няспраўны». У Мінску судзяць радавога за смерць іншага салдата

У залу суда Мінскага раёна абвінавачаны Сяргей Крупа прыходзіць у вайсковай форме. Хлопец выглядае разгубленым, прыгнечаным, ён не сядае на лаву, а стаіць перад трыбунай у чаканні суддзі. На суд радавы прыйшоў без адваката, ад паслугаў абаронцы адмовіўся і ў ходзе самога працэсу.

Паводле версіі следства, 4 мая падчас баявой падрыхтоўкі ад агнястрэльнага ранення загінуў 20-гадовы Дзмітрый Удод.

Абвінавачванне па ч.2 арт. 463 КК (Парушэнне правілаў абыходжання са зброяй, што пацягнула па неасцярожнасці смерць чалавека) прад'яўлена 25-гадоваму намесніку камандзіра баявой машыны Сяргею Крупу. Радавому 25 гадоў, ён родам з Мазыра. У яго сярэдне-спецыяльная адукацыя, у армію быў прызваны ў 2017 годзе.

— Хацеў служыць, мяне прызвалі ў 24 гады. Адтэрміноўку давалі з-за траўмы рукі ў дзяцінстве, ну, і сэрца там, — распавядае ў судзе Сяргей Крупа.

Сваю віну радавы прызнае цалкам. Нягледзячы на гэта, мама загінулага салдата просіць не караць Крупу, тлумачыць: атрымалася выпадкова, і прысуд ужо не верне ёй сына. Сёння жанчына ў судзе не прысутнічае, яна прыедзе заўтра ў Мінск з Гомельскай вобласці і выступіць на працэсе.

— У красавіку выбіралі найлепшы экіпаж Узброеных сіл. Мы таксама ўдзельнічалі ў гэтым, — распавядае Сяргей Крупа.

Экіпаж складаўся з трох чалавек: камандзіра баявой машыны Сцяпко, намесніка Сяргея Крупы і кіроўцы-механіка Дзмітрыя Удода. Абвінавачаны пералічвае, што ўваходзіла ў абавязкі кожнага:

— Камандзір браў стужку у механіка і павінен быў перадаць мне, а я ўжо зараджаў. Чым хутчэй усё зрабіць, тым лепш. Калі стужка зараджана, паведамляем пра гэта па рацыі. Затым паступае каманда, і мы страляем. Крупа ўдакладняе, што перад стрэлам усе люкі павінны быць зачыненыя. Асабіста яго абыходзіцца са зброяй вучылі яшчэ ў Печах, там жа азнаёмілі з адпаведнай інструкцыяй.

— Як наладжаны паводзіны падчас пазаштатнай сітуацыі? — удакладняе суддзя ў абвінавачанага.

— Трэба спыніць стральбу і паведаміць афіцэру. У камандзіра машыны з ім сувязь была, у мяне — не. Не працаваў шлемафон, — адказвае Крупа.

— Вы паведамілі пра гэта? — пытаецца суддзя.

— Усе ведалі, — кажа абвінавачаны радавы.

Як ён распавядае падчас допыту ў судзе, першыя тры этапы стральбы 4 мая праходзілі ў штатным рэжыме.

— Прыступілі да другога, пачаліся асечкі, камандзір машыны дакладваў пра гэта Сцяпко. Экіпаж, які страляў да нас, таксама казаў, што былі асечкі, — успамінае Сяргей Крупа. — А потым пачуў, што ўпала стужка, сказаў камандзіру зрабіць даклад. У спешцы я забыўся паставіць зброю на засцерагальнік. Потым мы выскачылі з машыны, пастроіліся ўсе трое, затым зноў заскочылі ў машыну. Я быў упэўнены, што механік на месцы, пачуўся міжвольны стрэл. Яшчэ спытаў у камандзіра: «Што гэта было?». Ён не ведаў. І я працягнуў далей зараджаць стужку.

— Хто-небудзь правяраў баявую гатоўнасць Удода? — пытаецца суддзя.

— Не.

— Як зразумець, што ён на месцы?

— Мы ўвесь час так займаліся, і механік заўсёды быў на сваім месцы, — тлумачыць суддзі абвінавачаны.

Экіпаж яшчэ некаторы час не ведаў, што Дзмітрый Удод загінуў. З-за асечак Крупа разрадзіў стужку і чакаў, калі ўсе астатнія скончаць страляць.

— Пасля адстрэлу ўсё вылезлі з машын, я шукаў Дзіму, бачыў, што ляжаў шлемафон. Падумаў, Дзіма пайшоў у прыбіральню. Далажыў камандзіру пра гэта, ён мяне не пачуў, — кажа Сяргей Крупа.

На яго думку, трагедыя адбылася, калі экіпаж залазіў у баявую машыну.

— Адбыўся стрэл. У мяне траўма рукі, яна дрэнна працуе. Мабыць, зачапіў спуск, зброя не была на засцерагальніку, - распавядае ў судзе радавы Сяргей Крупа. - Пасля таго, што здарылася мне стала дрэнна, пачало трэсці, мяне адвезлі ў медроту. Я шкадую.

Сяргей Крупа прызываўся ў войска з нязначнымі абмежаваннямі па службе. У яго характарыстыцы з вайсковай часткі пазначана, што ён зарэкамендаваў сябе пасрэдна, не шануе баявых таварышаў. «Няўважлівы, рассеяны, забываецца», - пазначана ў дакуменце.

— Вам і раней давалі такую характарыстыку ці толькі пасля таго, што адбылося? — пытаецца суддзя.

— Пасля, — кажа абвінавачаны Крупа.

З папярэдняга месца працы, наадварот, пра Сяргея толькі станоўчыя водгукі. З агучаных матэрыялаў справы ў судзе, становіцца вядома: эксперты пасля трагедыі аглядалі кулямёт, ён быў няспраўным. Як адзначае абвінавачваны, зброя прыбыла з іншай часці і страляла з асечкамі з-за няспраўнасці, а не таму, што Крупа з ёй няправільна абыходзіўся

16 лістапада ў хлопца заканчваецца тэрмін службы, пасля войска ён хоча працаваць інкасатарам. У рамках расследавання крымінальнай справы ў радавога арыштавалі маёмасць: канапу, тэлевізар, мікрахвалевую печ.

Калі віна намесніка камандзіра баявой машыны будзе даказаная, яму пагражае да 5 гадоў пазбаўлення волі.

• 0
• 0
• 0
• 0
• 0
• 0
• 0
• 0