«Ікея» праз крытыку выдаліла з сацсетак пост, дзе жанчыну параўналі з сабакам
Карыстальнікі фэйсбука раскрытыкавалі расійскае прадстаўніцтва шведскай кампаніі за рэкламны пост, у якім жанчыну параўналі з сабакам.
У публікацыі была змешчана выява сабакі, які сядзіць за сталом, накрытым сурвэткай «Ікея», і вінавата глядзіць у камеру. На стале — блінцы і варэнне. Ніжэй — подпіс:
«Калі вы выпадкова падрапалі яго машыну або пагрызлі тэпцікі:
- прыгатуйце блінцы з варэннем;
- пакладзіце на стол яго любімую настольную дарожку GODDAG/ГОДДАГ;
- сустракайце яго з лёгкай усмешкай;
- пазбягайце зваротаў «дарагі, нам трэба паразмаўляць».
Пост сабраў сотні гнеўных каментароў. «Ікея» спачатку выбачылася за недарэчнае параўнанне, а пасля і зусім выдаліла публікацыю.
Вядома, што кампанія падтрымлівае праграмы, скіраваныя на абарону правоў жанчын у свеце. У 2009 годзе «Ікея» ўдзельнічала ў адукацыйнай праграме «Галасы жанчын» у Індыі.
Каментары