Газавая вайна прымусіла еўрапейцаў ад словаў пра неабходнасць пошуку альтэрнатыўных крыніцаў энергіі перайсці да канкрэтных дзеянняў.
Газавая вайна прымусіла еўрапейцаў ад словаў пра неабходнасць пошуку альтэрнатыўных крыніцаў энергіі перайсці да канкрэтных дзеянняў.
Спыненне паставак расійскага газу ў Еўропу, якім Масква збіралася пакараць незгаворлівы Кіеў, можа бумерангам ударыць па інтарэсах «Газпрому», піша КоммерсантЪ . Еўропа, якая больш за іншых пацярпела ад газавага, прадэманстравала здольнасць знаходзіць выйсце з крызісу за кошт альтэрнатыўных крыніцаў і пастаўшчыкоў энергіі. Ужо цяпер можна казаць, падсумоўвае выданне, што расійска-ўкраінскі канфлікт дапамог Еўрасаюзу мабілізавацца на пошук шляхоў выбаўлення ад расійскай газавай апекі.
Пакуль у Брусэлі міністры энергетыкі разважаюць пра доўгатэрміновыя перспектывы і задачы, у шэрагу еўрапейскіх краінаў, у першую чаргу тых, што залежалі ад расійскага газу амаль на 100%, знайшлі выйсце з сітуацыі.
Напрыклад Грэцыя кампенсавала недахоп «газпромаўскіх» паставак газам з Алжыру і Азербайджану. Адгэтуль Афіны і надалей плануюць набываць газ у Азербайджане. Папярэдняя дамоўленасць ужо дасягнутая. З Баку дамовіліся таксама Турцыя і Італія.
Аўстрыя, якая на 70% залежыць ад паставак з Расіі, на дадзены момант разлічвае на ўласныя сілы. Як і Румынія.
У складанай сітуацыі апынуліся Сербія, дзе газавы крызіс ледзь не перарос у палітычны. Нагадаем, што пры канцы мінулага году насуперак супраціўленню апазіцыі афіцыйная Сербія падпісала з Расіяй шэраг дамоваў у сферы энергетыкі. Сярод якіх і пра пабудову газаправоду «Паўднёвая плынь». Шэраг краінаў, якія найбольш пацярпелі ад спынення паставак газу, прынялі рашэнне пра аднаўленне працы сваіх АЭС. Гэта датычыць Славеніі і Балгарыі.
У складаны час еўрапейскія краіны прадэманстравалі салідарнасць са сваімі суседзямі: Германія і Венгрыя дапамаглі газам Сербіі і Харватыі, Украіна прапанавала падтрымку Малдове і Балгарыі.
Эксперты лічаць, што Еўропа здольная вынесці з апошняга канфлікту ўрок.
«Газавая вайна аб’яднае Еўропу і забяспечыць падтрымку новай энергетычнай палітыцы Еўракамісіі, а менавіта скарачэнню імпарту газу ў параўнанні з папярэднімі планамі»,— выказаў упэўненасць старшыня East European Gas Analysis Міхаіл Карчомкін. На яго думку, гэта можа абярнуцца катастрофай для «Газпрому».
Каментары