У нацыянальным парку «Белавежская пушча» пачалася падрыхтоўка да будаўніцтва другой чаргі археалагічнага музея пад адкрытым небам, паведамляе БелТА.
На тэрыторыі помніка археалогіі «Камянюкі-3» будуць адноўленыя старажытнагерманскі падворак і славянскае паселішча, якія адносяцца адпаведна да II-IV і V-IX стагоддзя нашай эры.
Наведнікі змогуць убачыць падворак рудакопа з печчу для выплаўкі жалеза і кузняй, капішча ранніх славян і славянскае жыллё. На падворках можна будзе пабачыць побыт рамеснікаў - ганчара, хлебароба, каваля, ткача, краўца і інш.
Ёсць ідэя пабудаваць у адным з комплексаў археалагічнага музея пад адкрытым небам павільён, дзе будуць выстаўлены ўсе самыя цікавыя артэфакты, знойдзеныя на тэрыторыі Белавежскай пушчы.
Агульная плошча скансэна складзе 18 га. У перспектыве турыстычны аб'ект будзе ўключаць сем музейных комплексаў, якія адлюструюць асаблівасці развіцця матэрыяльнай і духоўнай культуры заходніх рэгіёнаў Беларусі ад каменнага веку да Сярэднявечча.
Каментары