Амерыканская кампанія Biogen спачатку паставіла крыж на спробе распрацаваць лекі абсалютна новага тыпу ад хваробы Альцгеймера, але ўрэшце прыйшла да натхняльнага выніку.
Новы сродак мае атрымаць назву адуканамаб (aducanumab). Кампанія заявіла пра намер пачаць працэс яго рэгістрацыі ў пачатку наступнага года. На інфармацыі пра гэта акцыі кампаніі падаражэлі на 27 %, піша Ройтэрз.
Ад хваробы Альцгеймера пакутуе ўсё больш людзей, бо працягласць жыцця расце, а гэтая хвароба развіваецца ў людзей у старасці. Пры Альцгеймеру чалавек губляе памяць, а пасля і элементарныя жыццёвыя навыкі. Часам хворыя застаюцца ў такім бездапаможным стане гадамі.
Вынаходка лекаў ад Альцгеймера можа даць мільярдныя прыбыткі. Амерыканская кампанія ў звышсакрэтным рэжыме працуе над адуканамабам і іншым эксперыментальным лекам, вядомым як BAN2401,у партнёрстве з японскай кампаніяй «Эйсай» (Eisai).
Некаторыя эксперты, аднак, ставяць пад сумнеў эфектыўнасць новага сродку, бо вынікі яго першых выпрабаванняў былі супярэчлівыя.
Новыя лекі грунтуюцца на так званай «амілоіднай гіпотэзе» — тэорыі, што, калі не дапусціць канцэнтрацыі аднаго з пратэінаў, з назапашваннем якога звязваюць хваробу Альцгеймера, яе можна прадухіліць. Многія аналагічныя лекі, якія распрацоўваліся раней, эфекту не далі.
Каментары