Абрабаваны беларус прапаў у Маскве. Ён пазваніў маці, але тая вырашыла, што гэта махляр, і кінула слухаўку
У сталіцы Расіі шукаюць 32‑гадовага Дзяніса Шведава, які знік пасля таго, як у яго ў грамадскім транспарце скралі заплечнік з дакументамі, тэлефонам, банкаўскімі карткамі і грашыма.
Мужчына застаўся без сувязі і сродкаў. Апошні раз блізкія змаглі аднавіць яго маршрут да 27 жніўня. Сястра Дзяніса распавяла mk.ru пра сітуацыю.
Паводле слоў сястры Дзяніса, Кацярыны, незадоўга да знікнення ён вяртаўся з працы і заснуў у грамадскім транспарце. У гэты момант у яго скралі заплечнік, у якім знаходзіліся дакументы, мабільны тэлефон, банкаўскія карткі і грошы.
Апошнія тыдні мужчына жыў у хостэлах і працаваў кур’ерам. Адрас сястры ён не ведаў. Яна нядаўна пераехала, а праз занятасць яны так і не паспелі сустрэцца.
— Адзіны нумар, які ён ведаў на памяць, быў нумар нашай мамы ў Беларусі, — распавядае Кацярына. — Ён папрасіў у мінака тэлефон, патэлефанаваў ёй і папрасіў грошай на білет. Мама вырашыла, што гэта махляры, і заблакавала нумар.
Некалькі дзён дзяўчына спрабавала звязацца з братам, але беспаспяхова. Тады яна спытала ў сваякоў, ці размаўлялі яны з Дзянісам. Менавіта пасля гэтага высветлілася гісторыя з дзіўным званком.
Сястра ўзяла нумар мужчыны, з тэлефона якога Дзяніс тэлефанаваў маці. Той распавёў ёй, дзе і пры якіх абставінах бачыў зніклага апошні раз. З таго часу, паводле слоў сваячкі, ніякіх дакладных звестак пра месцазнаходжанне Дзяніса няма.
Вядома таксама, што пасля крадзяжу мужчына звяртаўся ў паліцыю і напісаў заяву аб страце дакументаў.
— Злодзея знайшлі, але пры ім ужо нічога не было. Брата проста адпусцілі на вуліцу. Дзе ён цяпер, я не ведаю, — дадае сястра зніклага.
Дзяўчына падала заяву аб знікненні ў паліцыю і звярнулася ў пошукава-выратавальны атрад «ЛізаАлерт».
— У паліцыі сказалі, што будуць шукаць. «ЛізаАлерт» прынялі заяўку ў працу. Мы пішам усюды, публікуем інфармацыю, спрабуем знайсці хоць каго-небудзь, хто яго бачыў, — распавяла Кацярына.
Дзяніс Шведаў каля васьмі гадоў жыве ў Маскве. Паводле слоў сястры, раней ён ніколі не знікаў і заўсёды заставаўся на сувязі. Усе знаёмыя і сябры, з якімі сваячцы ўдалося звязацца, бачылі Дзяніса апошні раз з 24 да 27 жніўня.
Дзяніс нарадзіўся 25 снежня 1993 года. Апошняе месца, дзе яго бачылі — Шчарбінка, раён Спартыўнай вуліцы.
Сям’я просіць адгукнуцца ўсіх, хто мог бачыць мужчыну пасля 27 жніўня або валодае якой-небудзь інфармацыяй пра яго месцазнаходжанне.
Цяпер чытаюць
На будынку Ліцэя БДУ павесілі банэр з забітым кадэбістам Нірванай, а вучняў адвезлі на яго магілу5
Каментары