57 чалавек прыйшлі на праймэрыз у Століне ВІДЭА. Караван едзе ў Баранавічы
57 чалавек сабраліся ў Століне на перадвыбары адзінага кандыдата ад дэмакратычнай апазіцыі. Перамогу яны аддалі кіраўніку Руху «За свабоду» Юрыю Губарэвічу.
Ураджэнец Берасцейшчыны, ён учора перамог таксама ў Драгічыне, а сёння — у Пінску і заняў другое месца на сходзе ў абласным цэнтры.
Выбарцы ў Століне задалі прэтэндэнтам дзясяткі пытанняў: ад пенсійнай рэформы да фізічнага падабенства Янукевіча з Пуціным.
Відэа са Століна:
Галасы ў Століне размеркаваліся наступным чынам:
Юрась Губарэвіч — 31, Павел Севярынец — 17 галасоў, Мікалай Казлоў — 5, Аляксей Янукевіч — 0, Вольга Кавалькова — 1. 3 чалавекі не галасавалі.
Агульны залік: Севярынец — 339, Губарэвіч — 201, Казлоў — 47, Кавалькова — 20, Янукевіч — 14.
Губарэвіч, які стаіць на ліберальна-кансерватыўных пазіцыях, спадзяецца, што з прыцягненнем да праймэрыз увагі шырэйшага кола людзей ён здолее абысці хрысціянскага дэмакрата Паўла Севярынца.
Абодва кандыдаты выступаюць за ўмацаванне незалежнасці, рынкавыя пераўтварэнні і змену сістэмы ў краіне, але разыходзяцца ў тактычных і сацыяльных пытаннях. Севярынец блізкі да рэлігійных і сацыяльных кансерватараў, Губарэвіч — свецкі і ліберальны кансерватар.
«Гэта лагічны вынік, калі на сходы пачынаюць прыходзіць не ангажаваныя ў дзейнасць партыйных структур людзі», — сказаў «Нашай Ніве» пасля перамогі ў Пінску Юрась Губарэвіч.
«Папулістычныя лозунгі не знаходзяць падтрымкі ў шырэйшай аўдыторыі», — заўважае ён.
«Перамагчы можна, калі апазіцыйны кандыдат аб'яднае пратэставую большасць», — кажа Юры Губарэвіч.
У аўторак перадвыбарчы караван пераязджае ў Баранавічы, дзе сход пройдзе ў кавярні «Папараць-кветка» (вул. Камсамольская 23, корпус 1).
Баранавічы — вялікі прамысловы горад у цэнтры краіны, і яго прыхільнасці могуць адлюстроўваць сярэднебеларускія настроі. Баранавіччына — малая радзіма аднаго з прэтэндэнтаў, Аляксея Янукевіча з Партыі БНФ.
Цяпер чытаюць
Дзяцей-футбалістаў з Рэчыцы павезлі ў Геленджык па прыфрантовай вобласці Расіі. У аўтобус папаў беспілотнік15
Каментары