Аляксандра Лукашэнку ў паездках суправаджаюць журналісты дзяржаўных газет і тэлеканалаў. Але ёсць і персанальны фатограф. Шмат гадоў на гэтай пасадзе працуе Андрэй Стасевіч.
Апошнім часам фатограф знік з радараў. Аказалася, Стасевіч у бальніцы ўжо амаль месяц: пнеўманія і станоўчы тэст на каранавірус.
«Яму стала кепска недзе на Вялікдзень. З прэзідэнтам у манастыр ён не ездзіў, здаецца, але працаваў недзе ў Мінску. Вярнуўся ўвечары дадому — і стала кепска, тэмпература з’явілася, — распавёў «Нашай Ніве» сын Стасевіча. — Бацьку шпіталізавалі, дыягнаставалі двухбаковую пнеўманію. Стан больш-менш, на шчасце, на вентыляцыі лёгкіх не ляжыць, але лечыцца ўжо чатыры тыдні».
Па словах сына, у Стасевіча знайшлі каранавірус.
«Не ведаю, дзе ён мог захварэць. Ён амаль увесь час быў на працы, перад хваробай пастаянна ў паездках. Можа, падчас нейкай камандзіроўкі», — кажа сын.
Сям’ю фатографа таксама праверылі на «карону», ніхто з іх не захварэў.
Каментары