Звольненага за бел-чырвона-белы сцяг ратавальніка не кінулі ў бядзе: жыллё знайшлі, прапанавалі новую працу
Максіма Сташулёнка звольнілі з МНС паводле артыкулу. Сьпярша яго ўгаворвалі звольніцца па пагадненьні бакоў, але ратавальнік адмовіўся. Ён зьбіраецца праз суд абскарджваць сваё звальненьне, перадае Радыё Свабода.
У Менску ідзе барацьба за бел-чырвона-белыя сьцягі, грамадзяне іх масава вывешваюць, а невядомыя здымаюць, час ад часу іх здымаюць супрацоўнікі МНС. Але ня ўсе падтрымліваюць такія загады кіраўніцтва.
«Паведаміў у чат, дзе будуць здымаць сьцягі»
8 верасьня Максім заступіў на дзяжурства, пачуў на вуліцы размову пра тое, што зараз у два месцы Фрунзэнскага раёну прыедуць здымаць бел-чырвона-белыя сьцягі. Пра гэта Максім напісаў у чаце жыхароў Фрунзэнскага раёну.
«Я заступіў на дзяжурства, як звычайна. Толькі выйшаў з адпачынку, пакуль са сьцягамі не сутыкаўся, толькі чуў, што гэтым загадваюць займацца ратавальнікам. Я ад гэтага ўжо нэрваваўся. Праходзіў поруч і пачуў размову двух чалавек. Яны пералічвалі адрасы, я запомніў два і напісаў у чат. Пасьля я выдаліў паведамленьне і напісаў проста адміністратару чату», — расказвае Максім.
Максіма выклікала на размову кіраўніцтва і папрасіла напісаць тлумачэньні, ад чаго ён адмовіўся і сказаў, што нічога не парушаў. Пасьля гэтага Максіма выклікалі яшчэ раз і далі падпісаць загад аб звальненьні. Кіраўніцтва вырашыла, што ён парушыў: прысягу, падпіску аб невыдаваньні службовай інфармацыі і дзяржаўных тайнаў, а таксама два пункты кантракту.
«Людзі пачалі масава падтрымліваць»
«Я не лічу, што нешта парушыў, мне падабаецца мая праца. Напісаў, што азнаёміўся з загадам, але ня згодны зь ім. Мне не паказалі нейкай дакумэнтацыі, нейкіх загадаў. Пры чым тут да парушэньняў размова нейкіх двух чалавек? Мяне адразу пачалі падтрымліваць людзі, пісаць. Я вельмі хваляваўся, як адрэагуе жонка, бо ў нас малое дзіця і чакаем другое, але яна ведала маю пазыцыю і падтрымала», — кажа Максім.
Ён кажа, што бясплатна знайшоў адваката і цяпер будзе абскарджваць сваё звальненьне. І хоць спачатку Максіму казалі, што ён мусіць пакінуць інтэрнат цягам трох дзён, цяпер да аспрэчваньня звальненьня яго не высяляюць.
«Мне прыйшла вялікая падтрымка ад людзей, самае галоўнае пытаньне — з жыльлём — вырашанае, паступілі дзясяткі прапаноў з працай», — гаворыць Максім.
-
Мінчук зняў ролік пра чаргу ў паліклініцы, дзе было больш за 150 чалавек. За гэта на яго напісалі заяву ў міліцыю
-
Юліяна Шаметавец з «Кіберпартызанаў» стала маці — расказвае пра дэкрэтны адпачынак у ЗША і тое, ці сапраўды можна сумяшчаць працу з мацярынствам
-
Каверын выбачыўся за прапанову эратычнай фотасесіі для Ціханоўскай
Мінчук зняў ролік пра чаргу ў паліклініцы, дзе было больш за 150 чалавек. За гэта на яго напісалі заяву ў міліцыю10
Каментары