З самага пачатку пандэміі кавіду навукоўцы баяліся, што вірус мог перайсці да чалавека ад дзікіх жывёл. У такім выпадку ён можа захоўвацца ўнутры прадстаўнікоў розных відаў, муціраваць і зноў атакаваць людзей нават пасля заканчэння пандэміі.
Калі гэта здарыцца, то ў барацьбе з кавідам свет вернецца да самага пачатку, бо лічыцца, што вірус якраз і прыйшоў да нас ад дзікіх жывёл. Больш за тое, небяспека існуе не толькі ад іх, але і ад шматлікіх хатніх жывёл і тых, што жывуць у заапарку.
Лічыцца, што найбольш цяжка кантраляваць выбухі віруса сярод дзікіх жывёл. Існуе верагоднасць, што падчас цыркуляцыі сярод жывёл вірус кавіду змяняецца ў горшы бок, што робіць яго менш уразлівым да вакцын і больш смяротна небяспечным. Вось чаму так важна адсочваць распаўсюджванне віруса сярод жывёл, піша The Nature.
У пачатку пандэміі навукоўцы чакалі асноўнай небяспекі ад свінняў. Вядома, што яны могуць быць пераносчыкамі іншых вірусаў накшталт грыпу, а таксама каранавірусаў іншых тыпаў. Але падчас штучных заражэнняў свінні аказаліся ўстойлівымі да кавіду, і эксперты пераключыліся на працу з кажанамі. Лічыцца, што менавіта ад іх вірус SARS-CoV-2 перайшоў да людзей.
Эксперыменты паказалі, што некаторыя віды кажаноў могуць заражацца вірусам кавіду і перадаваць яго іншым відам.
Былі знойдзеныя і іншыя небяспечныя жывёлы, напрыклад, тхары, каты, янотападобныя сабакі, белахвостыя алені і некаторыя прыматы. Але больш за ўсё навукоўцаў здзівіла гісторыя з кавідам на норкавых фермах.
Усё пачалося з масавых смерцяў норак на дзвюх нідэрландскіх фермах у красавіку. У канцы 2020 года SARS-CoV-2 дасягнуў 70 нідэрландскіх фермаў і прадпрыемстваў у іншых краінах, у тым ліку ў Даніі, Грэцыі, Канадзе і ЗША. Пасля гэтага некаторыя краіны прынялі рашучыя меры для барацьбы з распаўсюджваннем вірусу сярод норак. У Даніі і Нідэрландах знішчылі ўсе норкавыя фермы, дзе гадавалася каля 20 мільёнаў жывёл.
Гэта гісторыя пацвердзіла занепакоенасць навукоўцаў наконт таго, што вірус здольны хавацца ўнутры жывёл такім чынам, што яго цяжка знайсці і кантраляваць, і пры гэтым застаецца небяспека яго вяртання да людзей.
Цяпер чытаюць
Беларусаў па вяртанні дамоў на мяжы ўсё часцей раздзяваюць дагала19
Каментары