Ціханоўскаму, Лосіку і Статкевічу выставілі пазоў на $1,2 мільёна. А як дзяліць гэту суму між усімі?
Мікалая Статкевіча, Сяргея Ціханоўскага, Ігара Лосіка, Арцёма Сакава, Дзмітрыя Папова і Уладзіміра Цыгановіча абвінавачваюць у арганізацыі беспарадкаў у Беларусі ў перыяд падрыхтоўкі і правядзення прэзідэнцкіх выбараў 2020 года. Усе яны пад вартай, хутка пачнецца суд у Гомелі. Але акрамя тэрміну ў калоніі ім пагражае яшчэ і грашовае спагнанне.
«Учора прынеслі ліст з Генпракуратуры ад 04.05 аб тым, што яна выставіла мне са «змоўшчыкамі» пазоў на 3,078 мільёна рублёў, а таксама ліст з Вярхоўнага суда аб перадачы нашай «справы» ў Гомельскі абласны суд, — напісаў Мікалай Статкевіч з Жодзіна. — Раней чуў, што Генпракуратура ўжо наклала арышт на маёмасць коштам 2 мільёны для забеспячэння пазову».
Атрымліваецца, што суму пазову мусяць спагнаць з шасцярых фігурантаў справы. Сума буйная — гэта прыкладна $1,2 мільёна даляраў.
Але як гэтыя грошы будуць спаганяцца з шасці чалавек?
«Наша Ніва» звярнулася па тлумачэнне да адваката Антона Гашынскага.
Ён распавёў, што ў такіх выпадках усе, каго прызнаюць вінаватымі, павінны кампенсаваць шкоду салідарна.
«Пры салідарнай адказнасці кожны з даўжнікоў аднолькава адказвае за доўг — крэдытор мае права патрабаваць вяртання доўгу як ад усіх салідарных даўжнікоў сумесна, так і ад любога з іх паасобку, — тлумачыць Гашынскі. — Суд пастановіць спагнаць суму салідарна, маёмасць абвінавачаных забраць у кошт пагашэння шкоды. А далей ужо судовыя выканаўцы будуць спаганяць».
Але што рабіць, калі ў нейкага фігуранта справы зусім няма грошай? У такіх выпадках неабходную суму будуць «набіраць» сыходзячы з магчымасцяў кожнага фігуранта. Умоўна кажучы, з Ціханоўскага спагоняць тыя легендарныя $900 тысяч даляраў, якія знайшлі за канапай, са Статкевіча і іншых — тое, што змогуць знайсці ў кожнага.
Цяпер чытаюць
Цапкала і Балкунец атакавалі літоўскага палітыка, які дапамагаў беларусам пасля 2020‑га і спрычыніўся да справы, якую завёў пракурор у Гаазе9
Каментары