У ЗША ўпершыню абралі мусульманіна ў Сенат. Раней Трамп называў гэтага кандыдата «джыхадыстам»
Абдул эль-Саед выйграў выбары ў рэспубліканца Майка Роджэрса.
Прадстаўнік Дэмакратычнай партыі Абдул Эль-Саед перамог на выбарах у Сенат ЗША ад штата Мічыган, абышоўшы рэспубліканца Майка Роджэрса. 42‑гадовы палітык стане першым мусульманінам у гісторыі амерыканскага Сената, піша Bild.
Падчас перадвыбарчай кампаніі яго неаднаразова крытыкаваў прэзідэнт Дональд Трамп, які называў Эль-Саеда «джыхадыстам». Пасля перамогі палітык звярнуўся да прэзідэнта:
«Дональд, я ведаю, што ў цябе былі праблемы з маім імем. Таму пасля таго, як Джэй Дзі прывядзе мяне да прысягі ў студзені, можаш проста называць мяне сенатарам».
Эль-Саед, які атрымаў адукацыю эпідэміёлага і раней узначальваў сістэму грамадскай аховы здароўя Дэтройта, зрабіў стаўку ў сваёй кампаніі на крытыку палітыкі Ізраіля ў сектары Газа і амерыканскай ваеннай дапамогі ізраільскім уладам.
У адным з перадвыбарчых відэаролікаў ён звязаў эканамічныя праблемы амерыканцаў з выдаткамі ЗША на падтрымку Ізраіля. Яго заявы выклікалі абвінавачанні ў антысемітызме, у тым ліку з боку часткі дэмакратаў. Сам Эль-Саед выступае за спыненне фінансавання амерыканскімі падаткаплацельшчыкамі ваенных аперацый Ізраіля.
Пазіцыя палітыка адносна Ізраіля выклікала рознагалоссі і ўнутры Дэмакратычнай партыі. Яго былая суперніца на ўнутрыпартыйных выбарах Хэйлі Стывенс перад галасаваннем заклікала падтрымаць рэспубліканца Майка Роджэрса.
Святлана Ціханоўская пра крытыку з боку Ціханоўскага: Мне ад гэтага вельмі крыўдна і непрыемна40
Каментары