Засакрэчаныя дакументы Міністэрства абароны Вялікабрытаніі, якія змяшчаюць падрабязную інфармацыю аб брытанскім эсмінцы «Дэфендэр» і брытанскіх узброеных сілах, былі знойдзеныя на аўтобусным прыпынку ў англійскім графстве Кент, паведамляе Бі-бі-сі.
У адным пакеце дакументаў абмяркоўваецца, у прыватнасці, верагодная рэакцыя Расіі на праход эсмінца праз воды паблізу ўзбярэжжа Крыма ў раёне Севастопаля. Гэта месца Расія лічыць сваімі тэрытарыяльнымі водамі, аднак гэта не прызнаецца большасцю дзяржаў свету, у тым ліку Вялікабрытаніяй, яны лічаць гэтыя воды ўкраінскімі.
Іншая частка дакументаў змяшчае абмеркаванне плана магчымай ваеннай прысутнасці Вялікабрытаніі ў Афганістане пасля завяршэння там аперацыі НАТА пад кіраўніцтвам ЗША.
Урад заявіў, што распачатае расследаванне.
Па словах прадстаўніка Мінабароны, адзін з супрацоўнікаў ведамства паведаміў аб прапажы канфідэнцыйных абаронных дакументаў. Ад далейшых каментароў прадстаўнік Мінабароны адмовіўся.
Прамоклы пачак дакументаў, усяго амаль 50 старонак, быў знойдзены за аўтобусным прыпынкам у Кенце раніцай у аўторак, гэта значыць напярэдадні інцыдэнту ў Чорным моры.
Чалавек, які знайшоў яго, пажадаў застацца невядомым. Ён звязаўся з Бі-бі-сі, калі ўсвядоміў далікатны характар зместу знойдзеных папер.
Бі-бі-сі мяркуе, што дакументы, якія змяшчаюць раздрукаваныя электронныя лісты і прэзентацыі PowerPoint, паходзяць з офіса высокапастаўленага чыноўніка Міністэрства абароны.
Дакументы, якія адносяцца да эсмінца «Дэфендэр», паказваюць, што місія, апісаная Мінабароны як «мірны праход праз украінскія тэрытарыяльныя воды», з зачэхленай карабельнай артылерыяй і карабельным верталётам у ангары, была праведзеная ў чаканні, што Расія можа адказаць агрэсіўна.
У сераду больш за 20 расійскіх ваенных самалётаў і два караблі берагавой аховы пераследвалі «Дэфендэр» на адрэзку даўжынёй у 19 км паблізу ўзбярэжжа Крыма.
Як паведаміла расійскае Міністэрства абароны, па курсе брытанскага карабля быў адкрыты папераджальны агонь. Урад Вялікабрытаніі аспрэчыў гэта, сцвярджаючы, што агонь адкрыты не быў.
Як вынікае з выяўленых дакументаў, у панядзелак аперацыю з удзелам «Дэфендэра», якая атрымала назву «Op Ditroite», абмяркоўвалі на найвышэйшым узроўні. У прыватнасці, гаворка ішла аб магчымай рэакцыі Расіі на з'яўленне карабля ля ўзбярэжжа Крыма.
«Што мы разумеем аб магчымым «ветлівым прыёме»?» — задавалася пытаннем прадстаўнік пастаяннага сумеснага штаба — гэта штаб трох брытанскіх службаў, які плануе і кантралюе ўсе ваенныя аперацыі.
У адной з прэзентацый, падрыхтаваных да нарады, адзначалася, што расійскія вайскоўцы могуць перайсці ад абарончай тактыкі да больш рашучых дзеянняў.
У штабе разглядалі два магчымыя маршруты «Дэфендэра» і тры магчымыя варыянты дзеянняў у адказ Расіі — ад «бяспечных і прафесійных» да «небяспечных і непрафесійных». Выбар спынілі на курсе, апісаным як «бяспечны і прафесійны прамы маршрут з Адэсы ў Батумі». У дакументах казалася, што такі варыянт дазволіў бы прадэманстраваць, што Брытанія лічыць воды паблізу Крыма ўкраінскімі.
Пры выбары іншага курсу ўдалося б пазбегнуць канфрантацыі з Расіяй, але ў гэтым выпадку магло скласціся ўражанне, што Брытанія «спалохалася і ўцякла». Гэта дазволіла б Маскве казаць, што Брытанія дэ-факта прызнае крымскія тэрытарыяльныя воды расійскімі.
У Мінабароны Брытаніі заявілі, што плануюць аперацыі акуратна, аналізуючы ўсе магчымыя рызыкі.
З выяўленых у Кенце дакументаў вынікае, што рашэнне накіраваць эсмінец менавіта такім курсам было прынята брытанскім урадам для таго, каб выказаць падтрымку Украіне, нягледзячы на магчымыя рызыкі.
Цяпер чытаюць
Дэпутат Клішэвіч стаў кандыдатам гістарычных навук з дысертацыяй пра разлажэнне беларускага камсамола ў часы «перабудовы»6
Каментары