«Грузім балоны кругласутачна». Хто цяпер пастаўляе кісларод у бальніцы
Пакуль у краіне прыбіраюць апошнія згадкі пра масачны рэжым, усё больш прадпрыемстваў пераключаецца на выпуск кіслароду для бальніц. «Наша Ніва» даведалася, што там адбываецца.
«Вырабляем выключна медыцынскі кісларод, вытворчасць тэхнічнага спынілі»
«СветлагорскХімвалакно» возіць кісларод у Светлагорскую і Рэчыцкую бальніцы.
«Цяпер мы вырабляем выключна медыцынскі кісларод, вытворчасць тэхнічнага пакуль спынілі, — паведамілі «Нашай Ніве» ў аддзеле продажаў прадпрыемства. — Перастроіцца было нескладана: некалькі гадоў таму мы ўжо выпускалі медыцынскі кісларод, забяспечвалі нашу бальніцу».
У Светлагорскую ЦРБ пастаўляюць да 190 балонаў у суткі, у Рэчыцкую (яна большая) — да 290.
«Грузім кругласутачна. Спецыяліст па рэалізацыі на тэлефоне з самага ранку і на выходныя званкі прымае. Вядуцца перамовы і з іншымі медыцынскімі ўстановамі», — кажуць на прадпрыемстве.
«Адгрузілі больш за 450 балонаў»
З суботы медыцынскі кісларод пачалі пастаўляць «Нафтан» і «Палімір».
«Дагэтуль мы рабілі толькі тэхнічны кісларод для мантажнікаў, будаўнікоў. Забяспечвалі ім сябе і арганізацыі-падрадчыкаў. Для вытворчасці медыцынскага кіслароду новых спецыялістаў не наймалі. Асноўныя ўстаноўкі засталіся тыя ж, тут больш арганізацыйныя мерапрыемствы спатрэбіліся. Да медыцынскага кіслароду патрабаванні якасці больш жорсткія: ступень чысціні, дадатковыя іншыя паказчыкі», — расказаў намеснік генеральнага дырэктара «Нафтана» Сяргей Яўтушык.
Паветра бярэцца за 2,5 кіламетра ад завода — на беразе возера Люхава і ў сасновым бары. Па паветразаборы яно паступае на станцыю, там ахалоджваецца да -180 градусаў, становіцца вадкім і раздзяляецца на фракцыі. Ад забору да атрымання кіслароду праходзіць каля 10 гадзін. У адным балоне — 8 кг (ці 6 метраў кубічных) газу. На кантроль кожная партыя возіцца на «Крыён».
Прадпрыемствы пастаўляюць кісларод у Наваполацкую гарадскую бальніцу. Як пісала БелТА, ужо адгрузілі больш за 450 балонаў. Штодзённа плануецца напаўняць больш за 250 балонаў (цяпер пастаўляецца па 150 балонаў).
«Гродна Азот» купілі новую ўстаноўку і наймаюць тэхнолага
Ніколі раней не вырабляў медыцынскі кісларод і «Гродна Азот». Цяпер яны выпускаюць яго ў вадкім і газападобным выглядзе, паставілі для гэтага новую ўстаноўку Linde. Першую партыю ў бальніцы адправілі 15 кастрычніка.
На прадпрыемстве адкрыта вакансія інжынера-тэхнолага (на вытворчасць вадкага медыцынскага кіслароду). З патрабаванняў да спецыяліста — вышэйшая фармацэўтычная адукацыя і стаж працы не меншы за тры гады ў арганізацыях, якія выпускаюць лекі ці кантралююць іх якасць.
Па словах намесніка генеральнага дырэктара па камерцыйных пытаннях Паўла Балябіна, «Гродна Азот» гатовы цалкам закрыць патрэбы абласных бальніц у газападобным кіслародзе.
Якая патрэба ў кіслародзе па краіне?
Нядаўна Аляксандр Лукашэнка заявіў, што ў краіне задзейнічана палова кіслародных кропак.
«У нас толькі 52% занята, як так не хапае кропак для кіслароду?» — сказаў ён падчас візіту ў Лідскую раённую бальніцу.
Але па іншых афіцыйных паведамленнях, патрэба ў кіслародзе больш высокая. У Віцебскай вобласці паведамлялі, што задзейнічана 84% кіслародных кропак. У многіх бальніцах у чацвёртую хвалю ўводзілі дадатковыя кропкі.
Асноўны вытворца медыцынскага кіслароду «Крыён» цяпер працуе на максімум і выпускае па 200 тон кіслароду ў суткі.
Цяпер чытаюць
Бабарыка расказаў, чаму перад выбарамі не шукаў падтрымкі ў Расіі. І як яго хацелі звольніць з Белгазпрамбанка за лозунг «Жыве Беларусь!»6
Бабарыка расказаў, чаму перад выбарамі не шукаў падтрымкі ў Расіі. І як яго хацелі звольніць з Белгазпрамбанка за лозунг «Жыве Беларусь!»
Максім Знак пра прэс-канферэнцыю ва Украіне: Мы дамовіліся не ўздымаць найбольш балючыя тэмы — катаванняў, санкцый, вайны. Можа, мусілі мы па-іншаму зрабіць99
Каментары