Гэта прэстыжны міжнародны хакейны турнір, што праводзіцца пры канцы снежня ў Швейцарыі.
Аргкамітэт Кубку Шпэнглера‑2009 абвясціў склад удзельнікаў міжнароднага хакейнага турніру, які штогод праводзіцца ў швейцарскім Давосе пры канцы снежня, у прамежку паміж Раством і Новым годам.
Мінскае «Дынама» стане першым беларускім клубам, які атрымаў запрашэнне выступіць у хакейным турніры з больш чым 80‑гадовай гісторыяй.
У Кубку Шпэнглера традыцыйна бярэ ўдзел мясцовая каманда «Давос», часам узмоцненая гульцамі чэмпіянату Швейцарыі, зборная Канады, што складаецца з гульцоў, якія гуляюць у Еўропе, а таксама пераможца мінулага турніру. Іншыя клубы запрашаюцца арганізатарамі.
Пераможцы Кубку Шпэнглера — 2008 маскоўскія дынамаўцы адмовіліся ад выступу ў сёлетнім розыгрышы.
Супернікамі «Дынама» Мінск будуць, апроч «Давоса» і зборнай Канады. нямецкі «Мангейм» і «Карлавы Вары» (Чэхія).
Сёлетні турнір стане апошнім, які будзе згуляны паводле вядомай формулы з удзелам пяці камандаў. Ад 2010 году на папярэдняй стадыі ўдзельнікі будуць падзеленыя на дзве групы па тры каманды ў кожнай.
***
«Кубак Шпэнглера» упершыню быў разыграны ў 1923 г. і з таго часу праходзіўся 82 разы. Яго натхняльнікам стаў вядомы швейцарскі лекар і змагар з сухотамі Карл Шпэнглер.
Часцей за іншых ўладальнікамі трафею станавіліся «Давос» (14 разоў) і зборная Канады (11). З савецкіх клубаў найчасцей за іншыя (5 разоў) прызам валодаў маскоўскі «Спартак». У найноўшай гісторыі пераможцамі былі тры расійскія клубы — маскоўскі ЦСКА (1991), магнітагорскі «Металург» (2005) і маскоўскае «Дынама» (2008).
За ўсю гісторыю «Кубак Шпэнглера» не праводзіўся толькі чатыры разы — у 1939, 1940, 1949 і 1956 гадах.
Цяпер чытаюць
Пракуратура пра смерць Мелказёрава: журналіст меў хранічную хваробу13
Каментары