Улады вырашылі не публікаваць спіс тых, хто будзе лічыць галасы на рэферэндуме?
Па плане, зацверджаным Цэнтрвыбаркамам, да 6 лютага павінны быць сфармаваныя ўчастковыя камісіі. Ужо вядома, што ў камісіях няма ніводнага прадстаўніка апазіцыі. Раней склад участковых камісій публікавалі на сайтах адміністрацый раёнаў. Сёлета спісаў няма. На сайтах райвыканкамаў можна знайсці толькі рашэнні аб размяшчэнні выбарчых участкаў.
Паводле ЦВК, у склад участковых камісій прайшлі 58 354 прадстаўнікі, вылучалася — 59 176. У асноўным гэта прадстаўнікі грамадскіх аб'яднанняў і партый (55,5%), самавылучэнцы (33,4%) і прадстаўнікі працоўных калектываў (11,1%).
Сваіх прадстаўнікоў вылучалі 11 партый, на фінішы засталося 6, прычым ва ўчастковыя камісіі па рэферэндуме не прайшоў ні адзін прадстаўнік апазіцыйных партый.
Варта адзначыць, што Камуністычная партыя Беларусі вылучыла ў склад участковых камісій 900 прадстаўнікоў, патрапілі ў іх 895, толькі 5 чалавек ад КПБ не ўключаныя.
Застаецца загадкай, хто персанальна будзе лічыць галасы на рэферэндуме, імёны членаў участковых камісій не агалошваюцца. Першае ж пасяджэнне камісій павінна адбыцца не пазней за 9 лютага.
Раней улады заяўлялі, што чальцы камісій сутыкнуліся з траўляй пасля выбараў-2020. Паколькі большасць выбарчых участкаў знаходзіцца ў школах, і лічаць галасы школьныя настаўнікі, асабліва напружанымі былі адносіні з імі — выпускнікі школ прыносілі свае граматы і медалі, вешалі на платы школ, выказваючы тым самым нязгоду з дзеяннямі педагогаў.
Некаторых чальцоў камісій 9 жніўня 2020-га вывозілі з участкаў пад аховай. Камісіі ж участкаў, дзе афіцыйна перамагла Ціханоўская, выбарцы віталі авацыямі.
Тады на большасці ўчасткаў не былі прадэманстраваныя копіі выніковых пратаколаў — ні назіральнікам, якіх не дапускалі паглядзець на падлік галасоў, ні выбарцам, якія прыйшлі да ўчасткаў, каб даведацца вынікі галасавання. Больш за тое, наўпрост каля школ былі масавыя затрыманні выбарцаў.
Міністр унутраных справаў заявіў, што чальцы выбарчых камісій не павінны баяцца працаваць, што ім будзе забяспечаная належная ахова.
Правядзенне рэферэндума будзе каштаваць нам 20 мільёнаў рублёў.
Як звязанае разняволенне афіцыйнай кавіднай статыстыкі з рэферэндумам па Канстытуцыі?
Карбалевіч: Самае парадаксальнае, што гэтая Канстытуцыя не патрэбная нікому: ні наменклатуры, ні грамадству, ні апазіцыі
У Чэхіі палякі збілі паляка, прыняўшы яго за ўкраінца з-за шапкі ў колерах Верхняй Сілезіі. Хлопец ехаў у велапрабег дзеля хворай на рак цяжарнай партнёркі2525
Каментары