Беларускія ўлады балтыйскім краінам: Шэраг расійскіх падраздзяленняў выконваюць задачы па-за межамі вучэнняў
Улады Беларусі далі адказ на запыт Літвы, Латвіі і Эстоніі з просьбай патлумачыць вайсковую актыўнасць на сваёй тэрыторыі і даць адказы ў рамках Венскага дакумента АБСЭ, піша Радыё Свабода.
У адказе гаворыцца, што агульная колькасць войскаў і ўзбраенняў, якія ўдзельнічаюць у цяперашніх вучэннях, не перавышае парогаў, вызначаных Венскім дакументам АБСЭ.
Пры гэтым адзначаецца, што
шэраг расійскіх падраздзяленняў выконваюць задачы па-за межамі вучэнняў — у прыватнасці, ахоўваюць паўднёвую мяжу Беларусі, дзе ахову нібыта немагчыма ўзмацніць за кошт беларускіх войскаў.
Таксама адзначаецца, што
ўсе расійскія вайсковыя падраздзяленні пасля вучэнняў збіраюцца пакінуць тэрыторыю Беларусі, а «парадак вываду войскаў знаходзіцца ў стадыі ўзгаднення».
Паводле беларускіх уладаў, яны далі дастатковую інфармацыю пра вучэнні і запрасілі назіральнікаў і медыя «з 17 краін».
9 лютага Літва, Латвія і Эстонія даслалі запыт Беларусі з патрабаваннем патлумачыць вайсковую актыўнасць на яе тэрыторыі і даць адказы ў рамках Венскага дакумента АБСЕ.
Венскі дакумент аб мерах умацавання даверу і бяспекі, прыняты ў 2011 годзе, вызначае, што ўсе краіны — удзельніцы пагаднення абавязаныя супрацоўнічаць адносна «любой незвычайнай і незапланаванай дзейнасці іх вайсковых сілаў па-за месцамі іх звычайнай дыслакацыі ў мірны час». Адпаведна з ім трэба інфармаваць іншыя краіны і запрашаць назіральнікаў, калі ў вучэннях бярэ ўдзел 13 тысяч і больш вайскоўцаў.
Балтыйскія краіны адзначалі, што ў пазачарговыя маштабныя вайсковыя вучэнні ўцягнутыя практычна цалкам узброеныя сілы Беларусі, пры гэтым дзяржавам — членам АБСЭ была прадастаўленая вельмі абмежаваная інфармацыя. Няма інфармацыі ні пра дакладную колькасць войскаў, ні пра ўзбраенне, якое будзе выкарыстоўвацца, ні пра планаваную дату вяртання расійскіх войскаў.
Чытайце таксама:
Cтаршыня Аб'яднанага камітэта начальнікаў штабоў ЗША патэлефанаваў начальніку Генштаба Беларусі
Ягор Лебядок: Да 2026-2028 гадоў верагоднасць вайны ў нашым рэгіёне складзе два з трох
НАТА: Расія перакінула ў Беларусь 30 тысяч салдат
«Маленькая пераможная вайна» з Украінай: ці дапамагла б яна Лукашэнку?
Расійскія войскі прыбываюць у Беларусь — колькі, з чым і навошта?
Першага намесніка гендырэктара «Белвеста» пасадзілі на тры з паловай гады за палітыку6
Першага намесніка гендырэктара «Белвеста» пасадзілі на тры з паловай гады за палітыку
«Я не святая, але ў мяне не было надзейнага пляча побач»: маці Ксюшы з СМА могуць пазбавіць бацькоўскіх правоў, яна ж даводзіць, што здольная выправіцца1717
Каментары