Навукоўцы стварылі штучную рыбу, што працуе на клетках чалавечага сэрца
У Гарвардскім універсітэце сканструявалі рыбу, у склад якой уваходзяць клеткі чалавечага сэрца. Праект называюць прарыўным і кажуць, што ён можа прынесці шмат карысці кардыялогіі.
Ствараць «біягібрыдную рыбу» гарвадскім навукоўцам дапамагалі калегі з амерыканскага ўніверсітэта Эмары. Для гэтага яны ўзялі паперу, пластык і жэлацін, а таксама дзве палоскі жывых клетак сардэчнай мышцы чалавека. Калі гэтыя клеткі скарачаліся, хвост рыбы рухаўся з аднаго боку ў іншы, што дазволіла ёй плаваць, піша Science.
Праект можа дапамагчы распрацоўваць лепшыя метады лячэння сардэчных хваробаў — напрыклад, кардыёстымулятары новага тыпу. Кіт Паркер, адзін з аўтараў праекта, тлумачыць, што для навукоўцаў цяпер важна навучыцца выкарыстоўваць жывыя клеткі ў біяінжынерыі. Сэрца — вельмі складаны орган, і для біяінжынераў недастаткова проста паўтараць яго анатомію, трэба яшчэ разумець біяфізіку і тое, як сэрца працуе. Гэта дазволіла б навукоўцам ствараць штучныя сэрцы для людзей, што пакутуюць на сур’ёзныя кардыялагічныя праблемы.
Як кажуць вучоныя, клеткі мускулаў, што выкарыстоўваліся ў эксперыменце, ўзмацніліся праз нагрузку на іх. Гэта добры знак і паказчык таго, што даныя праекта могуць дапамагчы ў лячэнні сардэчных хвароб.
Наступны крок для вучоных — сканструяваць больш складаную мадэль трохмернага марскога арганізма з выкарыстаннем клетак чалавечага сэрца. Такая мадэль, як і штучная рыба, функцыянавала б па прынцыпах біяфізікі сэрца.
Цяпер чытаюць
Латвія «па тэхнічных прычынах» закрыла мяжу з Беларуссю20
Каментары