Канцлер Германіі лічыць сваю палітыку ў дачыненні да паставак зброі Украіне правільнай. Але апазіцыя мае іншую думку
Федэральны канцлер Германіі Олаф Шольц адхіліў папрокі лідараў апазіцыі ў нерашучасці па пытанні паставак цяжкіх узбраенняў Кіеву і заявіў, што прымае рашэнні ў каардынацыі з саюзнікамі Германіі, піша Deutsche Welle.
«Я прымаю рашэнні хутка — і ў каардынацыі з нашымі хаўруснікамі», — заявіў Шольц у інтэрв'ю выданню Bild am Sonntag, якое выйдзе ў свет у нядзелю, 1 мая.
Па словах Шольца, ён не ўхваляе «залішнюю паспешлівасць і адзінкавыя дзеянні Германіі». Настойваючы на правільнасці абранага курсу, канцлер падкрэсліў, што «не настолькі палахлівы, каб падобныя абвінавачванні аказвалі на яго занадта моцнае ўражанне».
У той жа час ён падкрэсліў, што жорсткая крытыка яго рашэнняў цалкам легітымная, паколькі гэта з'яўляецца «часткай дэмакратыі». «Апазіцыя кідае сур'ёзны выклік. Для гэтага яна і існуе», — сказаў Шольц
Гаворачы аб усё большай колькасці незадаволеных яго палітыкай жыхароў Германіі, канцлер засведчыў, што «на замеры меркаванняў варта звяртаць увагу, але нельга ставіць свае дзеянні ў залежнасць ад іх, асабліва ў пытаннях вайны і міру гэта магло б стаць выбухованебяспечным».
Парламенцкая апазіцыя крытыкуе канцлера. Напярэдадні прэм'ер-міністр Баварыі і старшыня апазіцыйнага Хрысціянска-сацыяльнага саюза (ХСС) Маркус Зёдэр раскрытыкаваў пазіцыю Шольца і кіраўнічай кааліцыі па сітуацыі ва Украіне. Ён абвінаваціў канцлера ў нерашучасці і спробе сысці ад дыскусіі аб пастаўках цяжкіх узбраенняў Кіеву.
«Гэта не адпавядае прэтэнзіям на лідарства і ціску чаканняў, якія ўскладаюцца на ФРГ як на найбуйнейшую і наймацнейшую дзяржаву ў Еўропе», — заявіў Зёдэр.
Яшчэ раней пазіцыю Шольца па Украіне раскрытыкаваў старшыня апазіцыйнага Хрысціянска-дэмакратычнага саюза (ХДС) Фрыдрых Мерц. Па ягоных словах, сваімі паводзінамі канцлер ФРГ ставіць пад пагрозу згуртаванасць усёй еўрапейскай супольнасці. Мы хочам ведаць, якая зброя пастаўляецца Кіеву, адзначыў лідар ХДС.
Як вынікае з сацыялагічнага апытання, праведзенага Інстытутам Insa па замове Bild am Sonntag, працай кіраўніка германскага Кабінета міністраў незадаволеныя 54% рэспандэнтаў (32% задаволеныя). Гэта рэкордна нізкі ўзровень падтрымкі Шольца з моманту яго ўступлення на пасаду і першы раз, калі пра сваю незадаволенасць канцлерам заявіла большасць апытаных.
Дарэчы, стала вядома, што ў панядзелак 2 тмая лідар Хрысціянска-дэмакратычнага саюза Германіі Фрыдрых Мерц наведае Кіеў. І гэта важны крок у кантэксце ўнутрыпалітычнага змагання Германіі. Шольц пакуль што такога кроку не зрабіў.
Цяпер чытаюць
Памятаеце былога памежніка, які стаў дальнабойшчыкам і ў Германіі прызнаваўся ў любові да Лукашэнкі? З ім бяда11
Каментары