Ва Узброеных Сілах Беларусі пачалася раптоўная праверка боегатоўнасці. На дарогах з'явяцца калоны
У Беларусі пачалася раптоўная праверка сіл рэагавання, падчас якой воінскім часткам і падраздзяленням трэба будзе адпрацаваць пытанні прывядзення ў баявую гатоўнасць і іншыя вучэбна-баявыя задачы, заявілі ў Міністэрстве абароны Беларусі.
У ведамстве адзначылі, што праверка не нясе небяспекі міжнароднай супольнасці. Яе мэта, па інфармацыі Мінабароны РБ, — ацаніць здольнасць асабовага складу да аператыўнага рэагавання ў крызісных сітуацыях.
Войскі будуць дзейнічаць на незнаёмых участках мясцовасці ва ўмовах хуткага змянення становішча.
Склад сіл, якія прыцягваюцца да праверкі, будзе паэтапна нарошчвацца, што «дазволіць праверыць іх здольнасць процідзейнічаць ваенным пагрозам як на зямлі, так і ў паветры».
Праверка носіць комплексны характар. Падчас яе запланаваны рух значнай колькасці ваеннай тэхнікі, што можа абцяжарыць рух па дарогах агульнага карыстання. Мінабароны папрасіла жыхароў населеных пунктаў і вадзіцеляў транспартных сродкаў быць пільнымі на дарогах.
Мінулыя маштабныя вучэнні «Саюзная рашучасць — 2022» — сумесныя з Узброенымі сіламі Расійскай Федэрацыі — праходзілі з 10 па 20 лютага 2022 года. Праз чатыры дні расійская армія з тэрыторыі Беларусі ўварвалася ва Украіну.
Беларуская армія тады ў нападзе непасрэдна не ўдзельнічала, абмежавалася выкананнем тылавых функцый. Масква разлічвала захапіць краіну і ліквідаваць украінскую дзяржаўнасць за некалькі дзён. Аднак расійскія войскі былі адкінутыя ад Кіева і Харкава і спыненыя пад Мікалаевам і Адэсай.
Аб праверцы боегатоўнасці было абвешчана сёння, а ўчора адбылася тэлефонная размова Уладзіміра Пуціна і Аляксандра Лукашэнкі. Праверка адбываецца на фоне інтэнсіфікацыі расійскіх бамбёжак Украіны і спробы прарваць украінскі фронт у раёнах Ізюма, Лімана, Гуляйполя. Акрамя таго, заходнія разведкі гавораць пра намер Расіі пачаць баявыя дзеянні з тэрыторыі Прыднястроўя.
Цяпер чытаюць
Дзмітрый Семчанка: Я прыйшоў у пул Лукашэнкі біцца з Расіяй26
Каментары