Футбольная Чарнабаеўка. Беларуская зборная дзясяты раз запар не здолела перамагчы ў афіцыйнай гульні
Гэтым разам галоўная каманда краіны не адужала апанентаў з Казахстана ў рамках адборачнага этапа Лігі нацый. Праз нічыю 1:1 падначаленыя Георгія Кандрацьева акруглілі серыю без паспяховых матчаў да двухзначнага паказчыка.
Зборная Беларусі ніколі раней у гісторыі на афіцыйным узроўні казахстанцам не саступала. Нават больш: чатыры разы калектывы біліся ў розных турнірах пад эгідай УЕФА — і нават у самых напружаных двубоях «белакрылыя» дамагаліся перамогі.
Але зараз галоўная каманда Беларусі настолькі бездапаможная і безыдэйная, што, бадай, увасабляе стан спорту ў краіне цалкам. А таму заканамерна атрымлівае «пад хвост» нават ад тых, на каго раней не звяртала ўвагі.
Шчыра кажучы, 1:1 — яшчэ шчаслівы для беларусаў вынік. Бо супернік, які правёў хуткі мяч (на 13-й хвіліне адзначыўся Аймбетаў), мог яшчэ да перапынку паўтарыць выніковыя дзеянні. Але кіпер Паўлючэнка злавіў кураж і некалькімі сэйвамі выратаваў галоўнага трэнера ад сыходу ў адстаўку ўжо пасля заканчэння стартавых 45 хвілін.
Праўда, пра звальненне Кандрацьева наноў пачалі гаварыць пасля фінальнага свістка, нягледзячы на выратавальны мяч Малькевіча на 84-й хвіліне.
Усяго два балы пасля першага круга адбора і дзесяць (!) матчаў запар без перамог на афіцыйным узроўні сведчаць пра тое, што пад кіраўніцтвам слаўнага ў мінулым форварда зборная не можа анічога.
Адсюль страта амаль усіх шанцаў неяк прыстойна скончыць групавую стадыю турніра і перспектыва граць стыкавыя матчы за права не сваліцца ў дывізіён D — да футбольных карлікаў кшталту Андоры ды Сан-Марына.
Гэта больш чым верагодна, бо пасля трох тураў у Казахстана 9 балаў з 9 магчымых, славакі маюць 6 ачкоў, а беларусы могуць пахваліцца ўсяго двума баламі. Горш толькі азербайджанцы, 1 ачко.
Наступную сустрэчу, якой нашы спартсмены скончаць летні этап адбору ў Лізе нацый, каманда Кандрацьева правядзе ў панядзелак, 13 чэрвеня. Двубой з супернікамі з Азербайджана пачнецца а 19-й. Хоць не факт, што заўзятары на радзіме здолеюць яго паглядзець у нацыянальным эфіры. Прэцэдэнт з адменай трансляцыі на «Беларусь 5» сустрэчы супраць Казахстана ўжо створаны — як кажуць, спрацавалі еўрапейскія санкцыі, што «забанілі» жывы эфір.
Аднак, можа, футбольная ТБ-ізаляцыя будзе да лепшага? Бо з такімі якасцю і зместам гульні, як у «белакрылых», нават умоўны «Дом-2» будзе ўспрымацца фанамі лепей…
«Усе экстрэмісты ці ўжо асуджаныя, ці з'яўляюцца фігурантамі спраў, якія будуць разгледжаны судамі». Швед падводзіць рысу пад рэпрэсіямі?4
Каментары