Пасол Украіны пракаментаваў магчымасць адмены бязвізу з Беларуссю
Амбасадар Украіны ў Беларусі Ігар Кізім у інтэрвʼю Delfi пракаментаваў сённяшнюю навіну пра магчымае скасаванне бязвізавага рэжыму паміж Украінай і Беларуссю. Прэзідэнт Украіны Уладзімір Зяленскі даручыў ураду разгледзець такі варыянт, паколькі адпаведная петыцыя набрала неабходную колькасць галасоў.
«Асабіста я не падтрымліваю такую ініцыятыву», — сказаў пасол Украіны ў Беларусі.
Кізім тлумачыць гэта тым, што ўвядзенне віз з боку Украіны можа выклікаць адпаведныя захады ў адказ з боку Беларусі.
«Цяпер на тэрыторыі Беларусі шмат прыязджае ўкраінскіх грамадзян, якія бягуць з Расіі, якія спрабуюць сысці ад вайны, з акупаваных тэрыторый, у тым ліку з Крыма. Для якіх вярнуцца ва Украіну самы просты шлях — гэта ўсё-ткі праз Беларусь», — кажа ён.
Паводле пасла, беларусы даволі лаяльна ставяцца да ўкраінскіх грамадзян, якія прыбываюць на тэрыторыю Беларусі. Гэта дазваляе вырашаць пытанні з дакументамі консульскімі службамі і вяртаць людзей ва Украіну альбо пераязджаць у іншыя краіны ЕС. Гэта галоўная прычына, якую Кізім называе для нясвоечасовасці такога кроку.
Акрамя таго, увядзенне візавага рэжыму павялічыць нагрузку на дыпламатычныя службы, гэта паставіць шмат пытанняў, у тым ліку і гуманітарных.
Кізім звяртае ўвагу на тое, што Беларусь сваё прадстаўніцтва ў Кіеве закрыла, і не вяртае дагэтуль, «незразумела чаму». Гэта, паводле пасла, створыць цяжкасці ў атрыманні такой візы для тых грамадзян Украіны, які захочуць адведаць сваіх сваякоў у Беларусі.
«Я не хацеў бы цяпер капіяваць тут тое, што мы маем цяпер з Расіяй. Там быў гэты крок цалкам апраўданы. Што тычыцца Беларусі, я такой логікі тут не бачу», — кажа ён.
Цяпер чытаюць
«Чаму я павінен даказваць, што не дармаед?» Прадпрымальніка з Гомеля памылкова запісалі ў незанятыя — ён даведаўся толькі пасля вялізных рахункаў за камуналку2424
Каментары