Жыхарам кватэр, якія пацярпелі ад пажару ў Мінску, прапанавалі часовае жыллё
Жыхарам кватэр, якія пацярпелі ад пажару ў падʼездзе дома № 4 на бульвары Шаўчэнкі, прапанавалі часовае жыллё. Аднак пакуль яны адмовіліся ад прапановы і вырашылі пераехаць да сваякоў. Аб гэтым агенцтву «Мінск-Навіны» паведаміў намеснік старшыні Мінгарвыканкама Алег Корзун.
Жыхарам пашкоджаных агнём кватэр абяцаюць дапамогу ў рамонце, адновяць месцы агульнага карыстання, шкленне.
Цяпер на месцы здарэння працуе следча-аператыўная група. Пасля таго, як яна скончыць працу, у пашкоджаны падʼезд дапусцяць спецыялістаў ЖКГ, якія агледзяць памяшканні і вызначаць, што спатрэбіцца для аднаўлення.
Між тым, з ранейшага паведамлення Следчага камітэта пра здарэнне на бульвары Шаўчэнкі выдалілі сцвярджэнне, што прычына здарэння — выбух газу.
МНС паведаміла, што прычынай пажару магла стаць успышка пароў лёгкаўзгаральнай вадкасці. Пра гэта сведчаць знойдзеныя ў адной з кватэр ёмістасці, у якіх, магчыма, захоўвалася гэтая вадкасць.
Сёння ноччу ў доме на бульвары Шаўчэнкі ў Мінску адбыўся пажар. Загінулі шэсць чалавек, у тым ліку 11-гадовае дзіця. Тры чалавекі ў цяжкім стане шпіталізаваныя.
Каментары