«Што здарылася — незразумела». Загінуў 32-гадовы навуковец Аляксей Кляцкоў
Таленавітага навукоўца не стала 5 студзеня.
Загінуў Аляксей Кляцкоў у Варшаве. Знаёмыя пакуль не могуць раскрыць дэталі. «Што здарылася — незразумела. Ідзе паліцэйскае расследаванне», — адзначылі яны ў размове з «Нашай Нівай».
Пра смерць навукоўца раней паведаміў калега па працы ў Нацыянальнай акадэміі навук Сяргей Бесараб.
«Адзін з самых таленавітых беларускіх хімікаў-арганікаў. Спартыўны турыст, фатограф, тэхнічны эрудыт і вучоны, цудоўны хімік і абавязкова — сапраўдны Беларус», — напісаў ён пра Кляцкова.
Аляксей — выпускнік хімічнага факультэта Беларускага дзяржаўнага ўніверсітэта. Ён скончыў Інстытут падрыхтоўкі кадраў Нацыянальнай акадэміі навук. Працаваў у акадэмічным Інстытуце фізіка-арганічнай хіміі, у якім таксама адвучыўся.
Спецыялізаваўся на арганічнай хіміі, сінтэзе біялагічна актыўных гетэрацыклічных злучэнняў. У 2016 годзе быў лаўрэатам прэзідэнцкай стыпендыі для аспірантаў, а ў 2017 годзе стаў кандыдатам хімічных навук.
Аляксей Кляцкоў адміністраваў праект, у выніку якога былі сінтэзаваныя дабаўкі, здольныя павышаць эфектыўнасць біялагічна актыўных рэчываў, у тым ліку прэпаратаў супраць раку.
«Калі ўдасца знізіць нормы расходу проціпухлінных прэпаратаў, канцэнтрацыю, пры якой надыходзіць тэрапеўтычны эфект, то будзе павышацца ўзровень жыцця хворых падчас тэрапіі», — адзначаў навуковец.
Аляксей Кляцкоў быў аўтарам мноства публікацыяў у навуковых выданнях. Яго калегі кажуць, што неўзабаве па абароне кандыдацкай дысертацыі ён з'ехаў у Расію, дзе працаваў ва ўніверсітэце сяброўства народаў імя Патрыса Лумумбы.
Аляксей Кляцкоў перажываў за тое, што адбывалася на радзіме ў 2020 годзе. У адным з пастоў у фэйсбуку ён напісаў:
«Лічыце мяне беларусам» — гэта выказванне прызнання ўсім, хто падтрымлівае краіну ў важны адцінак яе гісторыі».
Што стала прычынай пераезду Аляксея Кляцкова ў Еўропу, дакладна невядома. У 2022 годзе ён ужо працаваў у Варшаўскім універсітэце.
Сяргей Бесараб піша, што апошнім часам Аляксей актыўна займаўся «нобелеўсканоснай» клік-хіміяй, і ў яго было шмат планаў.
«Незаменная страта для Беларусі і беларускай хімічнай навукі. Колькі ён мог бы яшчэ ўсяго зрабіць, адкрыць і вынайсці», — адзначае ён.
14 студзеня Аляксею Кляцкову мелася споўніцца 33 гады.
«Наша Нiва» — бастыён беларушчыны
ПАДТРЫМАЦЬ-
Дзядок — апазіцыянерам: Займаючыся дыскрэдытацыяй Офіса Ціханоўскай, вы льяце ваду на млын рэжыму
-
«Марзалюк — гэта наш зубр». Як праўладны гісторык нечакана стаў трэндам для зумераў у тыктоку
-
«Шатл-бас спачатку спыніўся, а потым пачаў павольна каціцца назад». Беларус, які стаў відавочцам аварыі ў Тайландзе, расказаў падрабязнасці
Цяпер чытаюць
У Мінску завяршылі будаўніцтва пяцізоркавага гатэля на месцы колішняга «Белэкспа»9
У Мінску завяршылі будаўніцтва пяцізоркавага гатэля на месцы колішняга «Белэкспа»
Сумленне, каханне, колы пекла і галівудскі фінал. У сям’і будаўніка і бібліятэкаркі з Пружанскага раёна Ігара і Юліі Лаптановічаў арыштавалі спачатку яго, пасля — яе, а пасля і бабулю33
Каментары