ГУБАЗіК затрымаў чарговага айцішніка. Ён адміністратар тэлеграм-канала, на якім жартавалі па-беларуску
Хлопца клічуць Андрэй Філіпчык. Яму 32 гады, ён нарадзіўся і вырас у Мінску. Відэа з ім з'явілася ў праўладным тэлеграм-канале.
Андрэй вучыўся ў БДУІР на прэстыжным факультэце камп'ютарных сістэм і сетак, спецыяльнасці «Праграмнае забеспячэнне інфармацыйных тэхналогій».
Беларушчынай, па яго словах, зацікавіўся ў раннім узросце і пад студэнцкі ўзрост стаў беларускамоўным. Ён займаўся перакладам кніг на беларускую, да прыкладу, удзельнічаў у аматарскім перакладзе кніг пра Гары Потэра, а яшчэ пісаў вершы.
Цяпер ён працуе айцішнікам у кампаніі Luxoft.
Хлопец вёў тэлеграм-канал «Па-беларуску». Там публікуюцца жарты і мемы на беларускай мове.
Пра затрыманне хлопца стала вядома з відэа ў праўладным тэлеграм-канале. На ім хлопец кажа, што ўдзельнічаў «у несанкцыянаваных масавых мерапрыемстваў не меней за пяць разоў». Сілавікі прымусілі яго назваць свой заробак, распавядае «Вясна».
У затрыманага дома знайшлі рэчы з нацыянальнай сімволікай. Сілавікі асобна адзначылі, што хлопец мае карту паляка. Яе паказалі ў відэа.
Жарты ў беларускамоўным канале сілавікі назвалі прасоўваннем «лацінкі і нянавісці да рускамоўнай сацыякультурнай прасторы».
Каментары