ЗША да гадавіны ўварвання ва Украіну ўвялі новыя санкцыі супраць расійскіх грамадзян і кампаній
У гадавіну пачатку вайны ва Украіне Мінфін ЗША аб’явіў пра ўвядзенне новага пакета санкцый супраць Расіі, паведамляе прэс-служба амерыканскага ведамства.
Пад абмежаванні трапілі 22 грамадзяна Расіі і 83 расійскія кампаніі, а таксама больш за 30 кампаній з трэціх краін, якія дапамагаюць Расіі абыходзіць санкцыі.
Сярод асоб, якія патрапілі пад амерыканскія санкцыі, — расійскія міністр энергетыкі, міністр працы і сацабароны, міністр культуры, міністр спорту, кіраўнік МНС і некаторыя кіраўнікі рэгіёнаў.
Таксама ў спіс патрапілі віцэ-прэм’ерка Таццяна Голікава, намеснік кіраўніка Адміністрацыі прэзідэнта Магамедсалам Магамедаў і вядучая тэлеканала «Россия 1» Вольга Скабеева.
Акрамя гэтага, уведзеныя візавыя абмежаванні ў дачыненні да 1219 прадстаўнікоў расійскіх Узброеных сіл.
Сярод кампаній, якія трапілі пад санкцыі, — Маскоўскі крэдытны банк, МТС Банк, Банк Санкт-Пецярбург, банк «Прымор'е», СДМ-Банк, Уральскі банк рэканструкцыі і развіцця, Уралсіб, ПВК «Рэдут». Уключаны ў гэты спіс і тэхнапарк «Сколкава».
Акрамя расійскіх кампаній, пад абмежаванні ў новым пакеце санкцый трапіла больш за 30 кампаній з трэціх краін, якія дапамагалі Расіі абыходзіць санкцыі, у тым ліку з незаконным абаротам зброі і незаконным фінансаваннем. Гэта арганізацыі са Швейцарыі, Балгарыі, Мальты і Кіпра.
Таксама з 10 сакавіка 2023 года ЗША ўводзяць 200% пошліну на імпарт алюмінію і алюмініевых прадуктаў з Расіі.
Еўрасаюз да гадавіны расійскага ўварвання ва Украіну таксама хацеў увесці новыя санкцыі, але не паспеў іх узгадніць.
Чытайце таксама:
Прэзідэнт Літвы: Літоўскія кампаніі, у дварах якіх лунаюць украінскія сцягі, могуць адначасова дапамагаць Лукашэнку
Ёзвяк: За вывад беларускага калію з-пад санкцый выступаюць Партугалія, Бельгія, Нідэрланды і Францыя
«У санкцый не мусіць быць шчылін». Ціханоўская прапанавала ЕС стварыць адпаведную працоўную групу
Наталля Калегава расказала пра дапамогу беларускім уцекачам, сваю сям’ю, стаўленне да Ціханоўскай. І патлумачыла, хто такія «бабры» і «зайцы»34
Каментары