У Літве хочуць прыпыніць прыём заяў на грамадзянства ад беларусаў і расіян
Прапанова такая зроблена ў інтарэсах нацыянальнай бяспекі, паведамляе «Дэлфі».
Спыніць прыём заяў на грамадзянства і прыняцце рашэнняў па ім ад грамадзян Беларусі і Расіі прапанавалі ў сувязі з ваеннай агрэсіяй супраць Украіны. Прапанову зарэгістравалі члены Сейма, міністр унутраных спраў Агнэ Білатайце і старшыня Камітэта Сейма па нацыянальнай бяспецы і абароне Лаўрынас Кашчунас.
Яны таксама прапануюць вызначыць выключэнні, гэта значыць, не спыняць прыём заяў і прыняцце рашэнняў у выпадках, калі асоба сама адмаўляецца ад грамадзянства Літоўскай Рэспублікі або калі асоба атрымлівае грамадзянства іншай дзяржавы.
«Грамадзяне Расіі і Беларусі, якія ўжо пражываюць у Літве з часовым або пастаянным дазволам на жыхарства, маглі б працягваць жыць у Літве, але іх заявы аб атрыманні грамадзянства не будуць прымацца, і пытанні аб іх грамадзянстве не будуць разглядацца, за выключэннем выпадкаў, калі асоба адмаўляецца ад грамадзянства Літоўскай Рэспублікі або калі набыла грамадзянства іншай дзяржавы», — кажуць ініцыятары прапановы.
Прапанаваная дата ўступлення закона ў сілу — 15 красавіка бягучага года. Тэрмін дзеяння закона — адзін год з магчымасцю прадаўжэння тэрміну дзеяння абмежавальных мер.
Цяпер чытаюць
«Соевыя экстрэмісты павінны адпрацаваць міску клубніц». Скардзіўся на ўмовы працы ў КДБ, а цяпер уцюхвае трэнінгі сілавікам — хто такі Антон Шабуневіч18
Каментары