У Жлобіне не спыняюцца судовыя працэсы за ўдзел у акцыях пратэсту ў жніўні 2020 года
У Жлобінскім раённым судзе працягвае працаваць судовы канвеер па крымінальных справах, заведзеных за ўдзел у акцыях пратэсту, якія адбываліся 9 і 10 жніўня 2020 года. 6 сакавіка судзілі Таццяну Дземчанку, паведамляе «Вясна».
Жанчыну судзілі за арганізацыю і падрыхтоўку дзеянняў, якія груба парушылі грамадскі парадак, або актыўным удзеле ў іх (ч. 1 арт. 342 Крымінальнага кодэкса).
Справу разглядаў суддзя Яўген Ерафееў.
Таццяна Дземчанка — адна з пяці затрыманых у Жлобіне падчас міліцэйскай аблавы, якая адбылася 13 снежня мінулага года. Тады былі затрыманыя сілавікамі знаёмыя паміж сабой Марына Ляхновіч, Таццяна Дземчанка, Вадзім Кір'янаў, Настасся Татарынава і Кірыл Камароў. Усіх іх змясцілі пад варту.
Вядома, што Настассю Татарынаву асудзілі 2 сакавіка, Вадзіма Кір’янава — 21 сакавіка, аднак вынікі гэтых судовых працэсаў пакуль невядомыя.
Таццяна Дземчанка сваю віну прызнала цалкам, а суду патлумачыла, што 9 жніўня 2020 года сумесна са сваёй сястрой увечары вырашылі выйсці на вуліцу прагуляцца, пры гэтым накіраваліся да гарадской плошчы. Па дарозе ўбачылі людзей, якія выкрыквалі розныя лозунгі, выказваючы незадаволенасць ходам і вынікамі выбараў прэзідэнта 2020 года. Людзі знаходзіліся як на ходніках, так і на дарозе, перакрыўшы цалкам праезную частку. Яна таксама выйшла на праезную частку і накіравалася ў першыя шэрагі натоўпу. Транспарт па вуліцы перастаў ездзіць. Калі супрацоўнікі міліцыі са шчытамі сталі падыходзіць бліжэй да натоўпу, яна спалохалася і ўцякла дадому.
Суд прызначыў ёй пакаранне ў выглядзе абмежавання волі без накіравання ў папраўчую ўстанову адкрытага тыпу на тэрмін у адзін год. Дземчанку вызвалілі з-пад варты ў зале суда.
Цяпер чытаюць
«Дзіма, мой мікраскоп за паўмільёна еўра стаіць у тваёй клініцы. Абсталяванне скраў ты». Заснавальнік «Новага зроку» расказаў пра адносіны з сям'ёй Абельскіх1919
«Дзіма, мой мікраскоп за паўмільёна еўра стаіць у тваёй клініцы. Абсталяванне скраў ты». Заснавальнік «Новага зроку» расказаў пра адносіны з сям'ёй Абельскіх19
«Да лейтэнанта прыехала маладая жонка, пабачыла, што адбываецца ў зоне, і застрэлілася». Выйшла заключная частка ўспамінаў Рыгора Бярозкіна пра ГУЛАГ і савецкі Мінск1818
Каментары