У Эстоніі таксама асцерагаюцца, што Крэмль можа пайсці на авантуру, скарыстаўшыся зручным момантам.
Эстонія на пастаяннай аснове перакідвае свае войскі бліжэй да мяжы з Расіяй і закупляе ўзбраенне, здольнае наносіць удары ўглыб тэрыторыі суседняй дзяржавы, паведамляе Бі-бі-сі са спасылкай на Financial Times.
Кіраўніцтва ўзброеных сіл і разведкі Эстоніі не лічыць, што Масква імкнецца да поўнамаштабнай вайны з НАТА — прынамсі, у бліжэйшыя два гады, падкрэслівае выданне. «Аднак яно лічыць, што ваяўнічы сусед рыхтуецца да магчымага канфлікту з гэтай невялікай дзяржавай Балтыі ў будучыні», — гаворыцца ў артыкуле.
У Эстоніі таксама асцерагаюцца, што Крэмль «можа пайсці на авантуру, скарыстаўшыся зручным момантам — напрыклад, распачаць уварванне абмежаванага маштабу, каб праверыць на трываласць пазіцыю НАТА аб калектыўнай абароне», сцвярджае газета.
Паводле яе даных, эстонскія вайскоўцы і разведчыкі прызнаюць, што ні сама Эстонія, ні НАТА на дадзены момант не забяспечваюць надзейнага стрымлівання пры такім сцэнары. Гэта падштурхнула краіну перайсці да стратэгіі «актыўнай абароны».
«Мы павінны пачынаць з мяжы і перамагаць ужо ў першых баях», — заявіў палкоўнік Тарма Кундла, камандзір 1‑й брыгады Сіл абароны Эстоніі, асноўнага баявога падраздзялення краіны.
У рамках новай стратэгіі яго брыгада будзе на пастаяннай аснове перадыслакаваная з Тапа ў Йыхві — горад за 50 км ад расійскай мяжы.
«Стрымліванне не працуе, — заявіў выданню высокапастаўлены прадстаўнік ваеннай разведкі Эстоніі. — Для ўсіх нас у краінах Балтыі крытычна важным перыядам для вырашэння гэтай праблемы будуць бліжэйшыя адзін-чатыры гады».
У маі ўрад Эстоніі ўнёс тэрмін «актыўная абарона» ў канцэпцыю нацыянальнай бяспекі краіны. «З таго часу невялікія, але высокапрафесійныя ўзброеныя сілы краіны пачалі ўтойлівую, аднак радыкальную перагрупоўку, — піша Financial Times. — Элітныя падраздзяленні з галоўнай ваеннай базы Эстоніі ў Тапа цяпер на пастаяннай аснове пераводзяцца на пазіцыі, размешчаныя на ўсходзе».
Як адзначае газета, акрамя новай базы ў Йыхві, у Нарве на мяжы з Расіяй будуецца аб'ект, на якім у выпадку крызіснай сітуацыі змогуць размясціцца да 1000 вайскоўцаў.
Цяпер чытаюць
Сталініста-ябацьку з Гомеля затрымалі пасля таго, як ён запрасіў Лукашэнку на гвалтоўнае закрыццё свайго трэцяга кафэ24
Каментары