У сеціва трапілі даныя карыстальнікаў папулярнага кніжнага сэрвісу
Уцечка даных адбылася ў кніжнага сэрвісу «ЛітРэс». Гэта сайт з электроннымі і аўдыякнігамі. У вольны доступ трапілі больш за тры мільёны радкоў даных.
Тэлеграм-канал «Уцечкі інфармацыі» паведамляе, што ў сеціва трапілі наступныя даныя:
— імя і прозвішча (не для ўсіх);
— адрас электроннай пошты (590 тысяч унікальных адрасоў);
— хэшаваны пароль (SHA1 без солі).
У «ЛітРэс» пацвердзілі ўцечку.
«Нам вядома пра ўцечку, цяпер мы правяраем інфармацыю і праводзім унутранае расследаванне для высвятлення прычын і ацэнкі сітуацыі», — паведамілі ў кампаніі агенцтву «Інтэрфакс».
У кампаніі адзначылі, што меры па абароне даных кліентаў там пачалі прадпрымаць яшчэ да таго, як інфармацыя аб уцечцы з'явілася ў інтэрнэце.
«Уся плацежная інфармацыя — у бяспецы, паколькі мы не захоўваем плацежных даных карыстальнікаў. Аднак, паколькі зламыснікі сапраўды атрымалі доступ да адрасоў электроннай пошты карыстальнікаў, мы рэкамендуем карыстальнікам змяніць пароль ад «ЛітРэс», а таксама ад усіх сэрвісаў, дзе яны выкарыстоўвалі такі ж або падобны пароль», — адзначылі ў прэс-службе.
У кампаніі паведамілі, што ў выпадку, калі з акаўнтамі карыстальнікаў будуць здзейсненыя якія-небудзь несанкцыянаваныя дзеянні, усе яны будуць скасаваныя сэрвісам на запыт кліента.
«ЛітРэс» валодае сэрвісамі Літрэс, MyBook, LiveLib.
Каментары