Ізраільская армія ноччу ўступіла ў баі з ХАМАС у сектары Газа, баевікі выкарыстоўвалі супраць ЦАХАЛ ракеты і выбуховыя прылады, армія Ізраіля супраць іх — артылерыю, танкі і авіяцыю. Баі ў самым сектары ідуць ужо амаль тыдзень, піша РБК.
Армія абароны Ізраіля (ЦАХАЛ) пасля сутыкненняў з байцамі ХАМАС на поўначы сектара Газа гэтай ноччу знішчыла «дзясяткі тэрарыстаў», гаворыцца ў паведамленні ЦАХАЛ у тэлеграм-канале.
«Войскі ЦАХАЛ сутыкнуліся з некалькімі тэрарыстычнымі ячэйкамі на поўначы сектара Газа, падчас баёў былі забітыя дзясяткі тэрарыстаў», — сказана ў паведамленні.
ЦАХАЛ сцвярджае, што байцы ХАМАС выкарыстоўвалі супраць ізраільскіх вайскоўцаў супрацьтанкавыя ракеты, гранаты і іншыя выбуховыя прылады. Армія Ізраіля выкарыстала артылерыю, танкі, а таксама наносіла авіяўдары з дапамогай верталётаў і ракетныя ўдары з ваенных караблёў.
Вайна Ізраіля і ХАМАС працягваецца ўжо амаль месяц. У сектар Газа ЦАХАЛ увайшла 27 кастрычніка, Ізраіль назваў гэта «пашырэннем» наземных аперацый у рэгіёне. 31 кастрычніка армія Ізраіля паведаміла, што нарасціла актыўнасць у сектары, туды ўвайшлі дадатковыя падраздзяленні пяхоты, бранятэхнікі, артылерыі і інжынерных войскаў.
Напярэдадні, 1 лістапада, камандуючы 162-й дывізіяй ЦАХАЛ брыгадны генерал Іцык Коэн заявіў, што ізраільскія войскі ўжо знаходзяцца каля «брамы» горада Газа.
ЦАХАЛ працягвае наносіць удары па сектары Газа для знішчэння аб'ектаў ХАМАС, напрыклад, па вытворчасці і захоўванні зброі, пускавых пунктаў супрацьтанкавых ракет і беспілотнікаў. 31 кастрычніка ізраільская армія ўдарыла па лагеры бежанцаў Джабалія, дзе, паводле сцвярджэння ЦАХАЛ, знаходзіўся адзін з камандуючых ХАМАС. Групоўка заявіла пра гібель амаль 200 чалавек пры ўдары па Джабаліі.
Усяго, паводле даных падкантрольнага ХАМАС Міністэрства аховы здароўя сектара Газа, ад моманту пачатку вайны ў рэгіёне загінулі амаль 8,8 тыс. чалавек, параненыя звыш 22 тысяч.
Цяпер чытаюць
Статкевіч расказаў, як выжываў у зняволенні. І чым займаецца цяпер1
Каментары