Ізраіль аб'явіў, што шэсць закладнікаў у Газе знойдзены мёртвымі, адзін з іх расіянін
Ізраіль заявіў, што яго вайскоўцы выявілі целы шасці закладнікаў, якія ўтрымліваліся ХАМАС у сектары Газа. Іх забілі незадоўга да гэтага.
У заяве Арміі абароны Ізраіля гаворыцца, што целы былі знойдзеныя ў суботу ў падземным тунэлі ў раёне Рафаха. ЦАХАЛ назваў імёны закладнікаў: гэта Кармэль Гат, Эдэн Ерушалмі, Херш Гольдберг-Палін, Аляксандр Лобанаў, Альмог Сарусі і сяржант Оры Даніна, піша BBC.
Прэс-сакратар ЦАХАЛ контр-адмірал Даніэль Хагары сказаў, што, паводле папярэдняй ацэнкі, яны былі «жорстка забітыя тэрарыстамі ХАМАС незадоўга да таго, як мы здолелі да іх дабрацца».
Форум сем'яў закладнікаў — група, якая прадстаўляе сем'і закладнікаў у Газе, — запатрабаваў ад прэм'ер-міністра Ізраіля Біньяміна Нетаньяху «звярнуцца да нацыі і ўзяць на сябе адказнасць за тое, што закладнікаў кінулі на волю лёсу».
Форум заявіў, што ўсе шасцёра палонных былі «забітыя ў апошнія некалькі дзён, перажыўшы амаль 11 месяцаў здзекаў, катаванняў і голаду ў палоне ў ХАМАС».
«Затрымка з падпісаннем здзелкі прывяла да іх гібелі і гібелі многіх іншых закладнікаў», — гаворыцца ў заяве.
Група таксама аб'явіла аб планах «спыніць жыццё ў краіне» ў нядзелю, папрасіўшы ізраільскую грамадскасць далучыцца да пратэстаў у Іерусаліме, Тэль-Авіве і іншых гарадах Ізраіля, каб заклікаць да здзелкі па абмене закладнікаў.
У сваёй заяве ў нядзелю раніцай ЦАХАЛ паведаміў, што целы загінулых былі «вернутыя на тэрыторыю Ізраіля». «Усе яны былі ўзятыя ў закладнікі 7 кастрычніка 2023 г. і забітыя тэрарыстычнай арганізацыяй ХАМАС у сектары Газа», — гаворыцца ў заяве войска.
«Ад імя дзяржавы Ізраіль я ад усяго сэрца абдымаю іх сем'і і прашу прабачэння за тое, што не змог вярнуць іх дадому ў цэласці і захаванасці», — заявіў прэзідэнт Ізраіля Іцхак Герцаг.
Высокапастаўлены прадстаўнік ХАМАС Ізат Эль-Рэшык заявіў, што Ізраіль, які адмовіўся падпісаць пагадненне аб спыненні агню, нясе адказнасць за гібель людзей.
Аляксандр Лобанаў быў адным з двух расейцаў, якія заставаліся ў палоне ў ХАМАС. Ён прадаваў марожанае і напоі на музычным фестывалі Nova, калі напалі баевікі.
Цяпер чытаюць
Прапагандысты запэўніваюць, што 196 палітвязняў ужо на свабодзе7
Каментары