Жыхары Каменнай Горкі скардзяцца на суседства са скейт-паркам. Моцна скрыгоча і замінае спаць
Гэтым летам у Каменнай Горцы адкрылі самы вялікі скейт-парк у сталіцы. Пляцоўка для экстрэмалаў на вуліцы Казіміраўскай хутка стала месцам прыцягнення для мінчан. Усё б нічога, але юныя скейтары і веласіпедысты выпрабоўваюць жалезныя канструкцыі на трываласць не толькі днём, але і ноччу, а таксама на досвітку.
Па словах жыхароў з навакольных высотак, многія з іх зусім забыліся пра цішыню і спакой. Сяргей — адзін з тых, хто жыве ў гмаху на вуліцы Лідскай, 6, і амаль штодзень чуе шум ад новай пляцоўкі, піша Onliner.by.
Са слоў Сяргея, пасля першых скаргаў каля спартыўнай пляцоўкі з'явіліся папераджальныя шыльды, у якіх мінчукам абмежавалі наведванне скейт-парку з 23:00 да 07:00. — Але на іх ніхто не звяртае ўвагі, — працягвае мінчук.
— Як каталіся, так і працягваюць рабіць гэта ў любы час сутак. Пры гэтым у адміністрацыі раёна пра гэтую праблему ведаюць, але вырашаць яе, мабыць, не спяшаюцца. Яшчэ адзін мінчук, Аляксандр, які таксама скардзіцца на шум, жыве ў панэльным гмаху на Лідскай, 2, якая бліжэй за ўсіх размешчана да скейт-пляцоўкі.
Ён, як і іншыя жыхары суседніх дамоў, звяртаўся ў розныя інстанцыі з просьбай вырашыць праблему з начным доступам на тэрыторыю скейт-парку. Па словах мужчыны, прайшло пару месяцаў, але далей слоў справы не рухаюцца. — Мы не хочам, каб пляцоўку закрывалі або пераносілі ў іншае месца. Дастаткова абгарадзіць яе і абмежаваць доступ на тэрыторыю ў начны час, — адзначае Аляксандр.
Што кажа адміністрацыя парку?
Журналісты звярнуліся ў «Мінскзелянбуд», на балансе якога знаходзіцца парк Уга Чавеса, каб даведацца, калі і як яны плануюць вырашаць праблему з шумам.
— Гэта пляцоўка адкрытага тыпу, таму мы не можам забараніць дзецям катацца, — кажа начальнік новага парку ў Каменнай Горцы Анатоль Цюшкевіч.
— Жыхары найбліжэйшых высотак сталі скардзіцца на шум літаральна ў першы месяц. Мы адрэагавалі і ўсталявалі таблічкі з абмежаваннем рэжыму часу, але яны, мяркуючы з усяго, праблемы не развязваюць. Адзіны выхад з сітуацыі, які мы бачым на дадзены момант, — абгарадзіць скейт-парк плотам і вызначыць рэжым яго працы. Пакуль адкрытым застаецца пытанне з фінансаваннем. Спадзяемся, у найбліжэйшым часе яно будзе вырашана.
У магілёўскай калоніі памёр 22-гадовы палітзняволены Дзмітрый Шлетгаўэр9
Каментары