З Беларусі сышоў буйны валютны брокер. Беларускі рынак Форэкс у заняпадзе
Адзінае ў Беларусі прадстаўніцтва міжнароднай брокерскай кампаніі E-Global Trade & Finance Group (вядомая як Forex4you ці Markets4you) было зачынена без тлумачэння прычын. Такі крок яшчэ больш згортвае доступ Беларусі да сусветнага пазабіржавага валютнага рынку.
Мінская кампанія ТАА «Ф-ИКС ФО Ю», адзіны беларускі філіял міжнароднай валютна-брокерскай кампаніі E-Global Trade & Finance Group (вядомая як Forex4you ці Markets4you), днямі спыніла сваю дзейнасць у Беларусі, паведамляе партал Finance Magnates. Афіцыйны сайт брокера ў Беларусі (forex4you.by) ужо не працуе, а ліцэнзія кампаніі была выдаленая з рэестру Нацбанка.
Брокер Forex4you, які абслугоўвае больш за 2,9 мільёна трэйдараў і 52 тысячы партнёраў па ўсім свеце, адкрыў свой філіял у Беларусі ў 2021 годзе, аднак пасля пачатку вайны зладзіў рэбрэндынг і змяніў назву на Markets4you, прыбраўшы са сваёй платформы рускую мову.
Прычына закрыцця філіялу Forex4you публічна не называецца, але гэта ўжо стала чацвёртым па ліку сыходам ліцэнзаваных Форэкс-брокераў з беларускага рынку з пачатку года, піша Finance Magnates.
Напрыклад, пляцоўка MTBankFX, якая таксама спыніла дзейнасць у гэтым годзе, скардзілася на «замарозку замежных каштоўных папер беларускіх інвестараў, немагчымасць або значнае падаражэнне міжнародных трансфераў у замежнай валюце, а таксама неабходнасць прымусова і экстрана прадаваць свае актывы».
Улетку Нацбанк Беларусі быў вымушаны прызнаць заняпад беларускага пазабіржавага валютнага рынку, адзначыўшы, што з 2022 года колькасць беларускіх кліентаў ліцэнзаваных Форэкс-пляцовак істотна знізілася і цяпер складае 4,6 тысячы ўдзельнікаў (у пачатку 2023 года такіх кліентаў было 29,2 тысячы).
Цяпер у краіне засталося ўсяго 6 Форэкс-брокераў, якія забяспечваюць выхад Беларусі на сусветны пазабіржавы валютны рынак (самы прыбытковы і буйны фінансавы рынак у свеце). Раней у Беларусі працавалі 32 такіх кампаній.
Рынак Форэкс (скарачэнне ад Foreign Exchange, ці абмен замежнай валюты) — найбуйнейшы міжнародны пазабіржавы рынак валюты, які з'яўляецца самым актыўным фінансавым рынкам у свеце са штодзённым абаротам у больш за 10 трыльёнаў даляраў. 90% гандлю на Форэкс забяспечваюць найбуйнейшыя банкі і цэнтральныя банкі розных краін.
Звычайныя карыстальнікі без вялікага капіталу могуць зарабляць на Форэкс выключна праз ліцэнзаваных брокераў (кампаній-пасярэднікаў) шляхам складання хуткіх угод-закладу на рост або падзенне курсаў валют, што, аднак, спалучана з вялікімі рызыкамі страціць укладанні.
Мінчук зняў ролік пра чаргу ў паліклініцы, дзе было больш за 150 чалавек. За гэта на яго напісалі заяву ў міліцыю10
Каментары