Традыцыйна на другія выхадныя верасня ў Мінску адзначаецца Дзень горада. Не стаў выключэннем і гэты год.
З надвор'ем сёлета пашанцавала, яно не перашкаджала ні праводзіць усе запланаваныя вулічныя мерапрыемствы, ні ў іх удзельнічаць.
Не абыходзілася без афіцыёзу. На цырымоніі ўкладання кветак каля стэлы «Мінск — горад-герой» галоўнай паводле статусу асобай была Наталля Качанава, таксама прысутнічаў міністр унутраных спраў Іван Кубракоў.
Па словах чытачоў выдання «Салідарнасць», на кожным кроку былі міліцэйскія патрулі. Людзі абураліся з нагоды праходу праз турнікеты да лакацый, чэргаў і асабістага дагляду. І ўвогуле, як звычайна на падобных мерапрыемствах у Беларусі, «сілавы» кампанент быў заўважны.
Сярод прапанаваных сувеніраў быў і «мерч Першага», хоць ажыятажным попытам і не карыстаўся.
Паміж Палацам спорту і Стэлай «Мінск — горад-герой» зладзілі гістарычны фестываль «Мінск старажытны».
Плошча Свабоды была аддадзена пад прадстаўленне губернскага Мінска. Тут жа грала і сімфанічная музыка.
Нямала месца традыцыйна было прысвечана і ваеннай тэматыцы.
Асноўная частка гулянняў праходзіла каля Палаца спорту, людна было таксама на набярэжнай Свіслачы ў Траецкім прадмесці. У месцах асноўных лакацый працавалі фуд-корты.
Свае мерапрыемствы праходзілі па раёнах Мінска.
Завяршыліся суботнія ўрачыстасці традыцыйным феерверкам.
Каментары