МЗС Літвы заявіла, што не атрымлівала ад Мінска прапаноў па нармалізацыі адносін. І назвала некалькі ўмоў
Міністэрства замежных спраў Літвы адказала на артыкул Максіма Рыжанкова ў газеце Адміністрацыі Лукашэнкі.
МЗС Літвы заявіла, што не атрымала ад Мінска ніякіх прапаноў аб нармалізацыі стасункаў.
У артыкуле для «Беларусь сёння» кіраўнік беларускага МЗС заклікаў Літву аднавіць супрацоўніцтва па лініі пагранічных і спецыяльных службаў, галіновых ведамстваў, міністэрстваў замежных спраў.
«Міністэрства замежных спраў Літвы не атрымлівала па дыпламатычных каналах прапановы беларускага боку, пра якія гаворыцца ў артыкуле, апублікаваным міністрам замежных спраў Беларусі», — цытуе паведамленне МЗС Літвы LRT.
У ведамстве падкрэслілі, што ў Беларусі працягваюцца палітычныя рэпрэсіі, краіна працягвае падтрымліваць Расію ў вайне супраць Украіны, а таксама вядзе інфармацыйную вайну супраць еўрапейскіх суседзяў.
МЗС Літвы назваў некалькі ўмоў для нармалізацыі адносін.
«Рэжым Лукашэнкі выдатна ведае, пры якіх умовах можна чакаць аднаўлення адносін паміж Літвой і Беларуссю, якія паваліліся па віне рэжыму: вызваліць усіх палітвязняў, выплаціць кампенсацыю ім і ўсім беларусам, якія пацярпелі ад пераследу, прыцягнуць да адказнасці вінаватых у гвалце і злачынствах — не толькі непасрэдных выканаўцаў, але і асоб, якія аддавалі загады», — гаворыцца ў паведамленні.
Сярод іншых умоў — правядзенне свабодных выбараў у Беларусі, аднаўленне справядлівасці для беларускага народа, а таксама для народа Украіны, які пацярпеў ад расейскай агрэсіі. Літва, акрамя таго, патрабуе пакараць вінаватых у злачынствах супраць чалавецтва, у тым ліку ў незаконных перасоўваннях украінскіх дзяцей, а таксама кампенсаваць страты, якія панесла Літва праз гібрыдную агрэсію Беларусі.
У МЗС Літвы заявілі, што маюць намер дамагацца далейшай ізаляцыі Беларусі і ўвядзення новых санкцый.
Цяпер чытаюць
Анжаліка Мельнікава тыдзень правяла на Шры-Ланцы і вылецела з дзецьмі ў Дубай33
Каментары