Макрон сустрэнецца з Шольцам і Мерцам для абмеркавання еўрапейскай бяспекі
Прэзідэнт Францыі хоча прыцягнуць Германію ў сваю «кааліцыю ахвотных» для падтрымкі Украіны. Гэтую кааліцыю ён разам з брытанскім прэм’ер-міністрам Кірам Стармерам фарміруе ўжо некалькі тыдняў, піша Bild.
Макрон і кандыдат у канцлеры Фрыдрых Мерц сустрэнуцца за вячэрай у Берліне. Галоўнымі тэмамі перамоў стануць тэлефонная размова Пуціна і Трампа, а таксама пытанне бяспекі Еўропы без удзелу ЗША. У выніку гаворка ідзе пра вайну і мір, а таксама мільярды еўра грошай падаткаплацельшчыкаў.
Не выключана, што Макрон і Мерц абмяркуюць ідэю размяшчэння французскай ядзернай зброі ў Германіі і іншых краінах ЕС.
«Я хачу верыць, што ЗША застануцца на нашым баку. Але мы павінны быць гатовыя да таго, што гэтага можа не адбыцца», — адзначыў Макрон.
Крытыкі гэтай ініцыятывы мяркуюць, што Францыя хоча мадэрнізаваць свой ядзерны арсенал за чужыя грошы, не будучы гатовай раздзяліць права прыняцця рашэнняў па яго выкарыстанні.
Мерц адкрыты да прапановы аб ядзерным шчыце. Кандыдат у канцлеры заявіў Bild, што зараз «як ніколі» ў інтарэсах Германіі весці гэтую дыскусію без табу: «Улічваючы сітуацыю, што склалася, нам неабходна абмеркаваць гэтыя пытанні не толькі з Францыяй, але і з Вялікабрытаніяй. Разам з ЗША нам патрэбны сумесны ядзерны шчыт абароны для Еўропы».
Дзейны канцлер Олаф Шольц, наадварот, лічыць, што амерыканская ядзерная зброя ў Германіі незаменая і не хоча, каб Трамп наогул задумаўся пра яе вывад.
Таксама будзе абмяркоўвацца «Белая кніга» аб будучыні еўрапейскай абароны, якую рыхтуе Еўракамісія. Вядома, што яна ўключае прапановы па стварэнні сумесных сістэм СПА.
Цяпер чытаюць
Памятаеце Таццяну Зарэцкую, якая са скандалам звальнялася з Кабінета Ціханоўскай? У Эстоніі яе падазраюць у махлярстве48
Каментары