Расійскі прызёр Паралімпіяды з парушэннямі інтэлекту пайшоў на вайну і загінуў
Аляксандр Рабатніцкі з дыягназам «арганічнае паражэнне мозгу» даслужыўся да камандзіра аддзялення ў разведцы.
Расійскі паралімпіец з парушэннем інтэлекту Аляксандр Рабатніцкі загінуў на вайне супраць Украіны.
У спартсмена было дыягнаставана «арганічнае паражэнне мозгу», але расійскае Мінабароны ўсё адно заключыла з ім кантракт, піша «Сибирь. Реалии».
30-гадовы Рабатніцкі даслужыўся да камандзіра аддзялення ў разведцы. Дакладную дату і абставіны яго гібелі родным і сябрам не паведамілі.
Па словах знаёмых Рабатніцкага, ён не змог прыстасавацца да жыцця пасля заканчэння спартыўнай кар'еры. Каля года таму ў яго з'явілася гульнявая залежнасць. На вайну паралімпіец пайшоў добраахвотна — каб расплаціцца з даўгамі.
Рабатніцкі скончыў карэкцыйную школу, пазней стаў заслужаным майстрам спорту па лёгкай атлетыцы сярод спартсменаў з парушэннем інтэлекту. На Паралімпійскіх гульнях у Токіа ў 2020 годзе ён узяў срэбра ў бегу на 1500 метраў сярод спартсменаў з паказчыкам IQ ніжэй за 75.
Гэта не першы выпадак, калі ў Расіі на вайну ішлі людзі з парушэннем інтэлекту. Так, з калоніі на вайну завербавалі забойцу Аляксандра Нагарнюка, у якога было дыягнаставаная «разумовая адсталасць».
У 2022 годзе Нагарнюку прысудзілі 6 гадоў калоніі за забойства «з-за пакета піва і тэлефона». У 2023 годзе яго памілаваў Пуцін, а ў 2024 годзе мужчына загінуў падчас штурму, так і не выплаціўшы кампенсацыю, прысуджаную судом маці яго ахвяры.
Каментары