Лукашэнка не прыехаў на святкаванне Дня дзяржаўнай сімволікі — замест сябе адправіў Турчына
Відаць, пералёты паміж Мінскам і Масквой на 9 мая здароўя Лукашэнку не дадалі.
Аляксандр Лукашэнка не ўзяў удзел у святкаванні Дня дзяржаўных сімвалаў на плошчы Дзяржсцяга. Замест яго перад бюджэтнікамі, сілавікамі і членамі БРСМ выступіў прэм’ер-міністр Аляксандр Турчын. Ён павіншаваў прысутных ад свайго імя, а таксама агучыў зварот начальніка.
Сёлета арганізатары падрыхтавалі шэсце з самым вялікім чырвона-зялёным сцягам даўжынёй 500 метраў. Дзеля гэтага перакрылі праспект Пераможцаў.
Летась Лукашэнка ўдзельнічаў у цырымоніі, а вось у 2023 годзе на свяце яго не было. Тады ён адчуў сябе вельмі дрэнна падчас параду 9 мая ў Маскве: не здолеў прайсці некалькі соцень метраў разам з іншымі кіраўнікамі дзяржаў. Увечары таго ж дня ўпершыню за час свайго кіравання ён не змог прачытаць прамову на ўскладанні кветак на плошчы Перамогі — замест яго гэта зрабіў міністр абароны Віктар Хрэнін. Тады ж картэж Лукашэнкі дзве гадзіны знаходзіўся ў спецыялізаванай бальніцы ў Ждановічах.
Сёлета, відаць, Лукашэнка вырашыў адпачыць ад напружанага святочнага графіку. На 9 мая ён злятаў у Маскву на парад, у той жа дзень вярнуўся ў Мінск і назіраў за ўласным парадам. Пры гэтым апошні тыдзень на публічных мерапрыемствах ён выглядае не вельмі: з цяжкасцю чытае прамовы стоячы, дрэнна ходзіць і ледзь стрымлівае трэмар галавы.
Цяпер чытаюць
Сын Сяргея Бульбы збірае грошы ў Польшчы, прыдумаўшы сабе біяграфію ветэрана і палітычнага ўцекача17
Каментары