Зімоўскі: Аб датэрміновым вызваленні Ягора Рыбакова хадайнічала Белтэлерадыёкампанія
Белтэлерадыёкампанія хадайнічала аб датэрміновым вызваленні экс‑кіраўніка БТ Ягора Рыбакова. Пра гэта на прэс‑канферэнцыі 31 сакавіка ў Мінску паведаміў старшыня Белтэлерадыёкампаніі Аляксандр Зімоўскі.
Паводле яго слоў, накіраванае каля трох тыдняў таму хадайніцтва аб вызваленні Рыбакова стала адным з фактараў, што паўплывалі на яго датэрмінова‑ўмоўнае вызваленне.
Гаворачы аб матывах гэтага хадайніцтва, Зімоўскі паведаміў, што «запазычанасць, якая ўтварылася ў Рыбакова перад Белтэлерадыёкампаніяй па рашэнні суда, будзе хутчэй кампенсавана, калі ён будзе працаваць не ў калоніі».
«Мы матывавалі свой зварот у тым ліку і тым, што ў Рыбакова будзе магчымасць хутчэй разлічыцца», — сказаў Зімоўскі.
Адказваючы на пытанне аб магчымасці працаўладкавання Рыбакова, Зімоўскі заўважыў, што «калі ён асуджаны з паніжэннем у правах, то ён не зможа займаць кіруючыя пасады, прынамсі, у Белтэлерадыёкампаніі». «Але рэпарцёр ён добры», — дадаў кіраўнік БТ. Акрамя гэтага, ён паведаміў, што запазычанасць Рыбакова перад Белтэлерадыёкампаніяй часткова пагашана. Паводле слоў Зімоўскага, ён пакуль не сустракаўся з Рыбаковым.
Былы старшыня Белтэлерадыёкампаніі Ягор Рыбакоў 11 лютага 2005 года быў прыгавораны да 11 гадоў пазбаўлення волі ў калоніі ўзмоцненага рэжыму з канфіскацыяй маёмасці. Такое рашэнне прыняў Вярхоўны суд Беларусі. Рыбакоў быў прызнаны вінаватым у атрыманні хабару ў асабліва буйным памеры, замаху на атрыманне хабару, крадзяжы з выкарыстаннем службовага становішча і арганізацыі каналаў па адмыванні і легалізацыі незаконна набытага абсталявання. Рыбакову было прапанавана добраахвотна вярнуць тэлерадыёкампаніі 212 мільёнаў рублёў — суму нанесенага ўрону.
Каментары