Новы недарагі баявы беспілотнік, прызначаны для канкурэнцыі з беспілотнікамі тыпу Shahed іранскай распрацоўкі, прэзентавалі ў Пентагоне. Чым ён адметны?
Як паведамляе Defence-blog, Злучаныя Штаты паказалі новы танны баявы дрон, распрацаваны як адказ на іранскія беспілотнікі тыпу Shahed-136, якія шырока выкарыстоўваюцца ў войнах ва Украіне і на Блізкім Усходзе. Новы дрон атрымаў назву LUCAS (Low-Cost Uncrewed Combat Attack System — «танная беспілотная баявая сістэма атакі»).
Прэзентацыя адбылася ў Пентагоне 16 ліпеня. Міністру абароны ЗША Піту Хэгсэту гэты дрон прадэманстравалі на прэзентацыі найноўшых вайсковых тэхналогій, уключаючы беспілотныя машыны, здольныя дзейнічаць у розных умовах — у паветры, на зямлі, на моры.
Дрон LUCAS распрацавала амерыканская фірма SpektreWorks са штата Арызона.
Выданне апісвае LUCAS як надзейны і танны беспілотнік, прызначаны для працы ў складаных умовах з мінімальнымі лагістычнымі патрабаваннямі. Адкрытая архітэктура дазваляе дрону хутка змяняць карысную нагрузку, выконваючы місію разведкі, атакі ці падтрымкі сувязі. Пры гэтым ёсць магчымасць ставіць розныя рухавікі ці сістэмы сілкавання — у залежнасці ад задачы.
Ён можа запускацца рознымі спосабамі, як з дапамогай ракеты (RATO) ці проста з грузавіка або іншай машыны, што робіць яго асабліва зручным для хуткага прымянення ў палявых умовах.
І самае галоўнае — для яго запуску не патрэбныя спецыялісты, з ім могуць працаваць звычайныя салдаты без спецыяльнай падрыхтоўкі, што дазваляе вельмі хутка і масава выкарыстоўваць такія дроны ў баявых умовах.
Адзначаецца, што LUCAS — гэта аднаразовы дрон-камікадзэ, які распрацаваны як танная альтэрнатыва дарагім традыцыйным сістэмам узбраення.
Ён здольны самастойна арыентавацца, працаваць у групе з іншымі беспілотнікам і наносіць удары па загадзя вызначаных ці выяўленых у палёце цэлях. Такая каардынаваная групавая праца павышае эфектыўнасць аперацый і дазваляе хутка рэагаваць на змяненні сітуацыі на полі бою.
Дрон абсталяваны сучаснымі навігацыйнымі сістэмамі, якія адпавядаюць строгім патрабаванням да памеру, вагі і энергаспажывання. Ён таксама мае інтэлектуальную сістэму кіравання карыснай нагрузкай, якая дазваляе дыстанцыйна ўключаць або адключаць абсталяванне на борце (напрыклад, камеры, сувязь, выбухоўку) падчас палёту.
Паведамляецца, што LUCAS таксама зможа выконваць функцыю рэтранслятара ў межах адмысловай сеткі MUSIC (Multi-domain Unmanned Systems Communications), якая аб’ядноўвае розныя беспілотныя сістэмы ў розных сферах (паветра, зямля, мора і г.д.).
Гэтая магчымасць павінна павысіць бяспеку і надзейнасць сувязі паміж войскамі ЗША і саюзнікаў, асабліва ў складаных умовах, дзе звычайныя каналы сувязі могуць перарывацца.
Кампанія SpektreWorks пацвердзіла выданню, што дрон LUCAS ужо прайшоў усе неабходныя выпрабаванні і цалкам гатовы да масавай вытворчасці. У найбліжэйшы час ён можа быць уключаны ў арсенал узброеных сіл ЗША і іх саюзнікаў.
У СІЗА КДБ адшукаўся падпалкоўнік Зара, якога сілавікі лічаць аналітыкам Сахашчыка. Як ён апынуўся ў Беларусі — невядома12
Каментары