Беларускія хірургі ўпершыню правялі складаную аперацыю на ўнутраным вуху
У Рэспубліканскім навукова-практычным цэнтры отарыналарынгалогіі ўпершыню ў гісторыі беларускай медыцыны правялі аперацыю на ўнутраным вуху, паведаміла прэс-служба Мінздароўя.
Пацыенткай стала 52‑гадовая жанчына з рэдкім сіндромам Мінора. Пры гэтым захворванні касцяная сценка верхняга паўкруглага канала ўнутранага вуха вытанчаецца, пакуль у ёй не ўтвараецца дэфект. Гэта можа выклікаць моцнае галавакружэнне, шум і пульсацыю ў вуху, а таксама парушэнні раўнавагі.
Раней у Беларусі такіх пацыентаў хірургічна не лячылі, а толькі здымалі сімптомы. Унутранае вуха з'яўляецца вельмі маленькай і далікатнай структурай, якая адказвае за слых і раўнавагу, таму аперацыя патрабуе высокай дакладнасці.
Аперацыю правялі загадчык аддзялення отарыналарынгалогіі для дарослых Іван Гарнастай і навуковы супрацоўнік нейрахірургічнага аддзела РНПЦ неўралогіі і нейрахірургіі Яўген Пешка. Яны ліквідавалі дэфект верхняга паўкруглага канала праз трансмастаідальны доступ.
Гэта малаінвазіўная методыка: хірургічны доступ ажыццяўляецца праз соскападобны адростак без шырокіх разрэзаў і трэпанацыі чэрапа. Яна дазваляе зменшыць рызыку ўскладненняў, паскорыць аднаўленне і скараціць час знаходжання ў стацыянары.
Медыкі разлічваюць, што пасля першай такой аперацыі методыка будзе ўкаранёная ў практыку і стане даступнай для іншых беларускіх пацыентаў з сіндромам Мінора.
Ціханоўская шчыра расказала пра хваробу сына і нябачную працу жанчын. «Дзесяць гадоў свайго жыцця я прысвяціла яму і яго рэабілітацыі»
У ЗША з міграцыйнай турмы вызвалілі беларуску, у якой быў рак шчытападобнай залозы
Літоўская стаматалогія за гадзіну адгукнулася дапамагчы беларусам. Невядомыя гісторыі першага дня вызваленых палітвязняў
Каментары